Виринра хьиз, райондин аялрин музыкальный школадани Дагъустандин халкьдин шаир СтIал Сулейманан 140 йисан юбилейдиз виликамаз гьазурвилер акваз башламишна. 30 йисалай виниз школадиз регьбервал гузвай ДР-дин культурадин лайихлу работник Къазибег Къурбанова чаз лагьайвал, чIехи шаирдин юбилейдиз талукь яз ина са жерге мярекатар кьиле тухвана, и кар давамни ийизва.
Мукьвара музыкальный школада СтIал Сулейманан юбилейдиз талукьарна концертдин чIехи программа къалурна. Велибегова Гуьлуьшана хуралай кIелай «Билбил»» шиир, Къехлеров Эльбруса «Марал руш»), Ибадулаева Мадинади («Сулейман»), Гьуьсейханова Ханума («Рушариз») лагьай манияр, школадин муаллимрин халкьдин алатрин ансамблди, аялрин далдамчийрин ва чIагъанчийрин дестейри тамамарай макьамар, Межидов Тимура кларнетдай, Мейланова Натиди пианинадал тамамарай авазар, ДаркIушрин филиалдин аялри къалурай «Зазни хуш я ви шаламар» сегьне жюридиз ва тамашачийриз гзаф бегенмиш хьана.