Алатай гьафтеда, 5-майдиз, машгьур писателринни шаиррин, генералринни алимрин, кьегьал рухвайринни баркаллу рушарин макан тир Цмуррин хуьре вичихъ неинки СтIал Сулейманан район ва Лезгистан, гьакI Дагъларин уьлкве патални еке метлеб авай вакъиа – Шайдаеврин хзанди чпин харжидалди эцигнавай кIелунинни спортдин Центр (УСЦ) ишлемишиз вахкуниз ва имарат рагьметлу генерал, тарихдин илимрин доктор Мегьамед-Гьанифа Гьажибалаевич Шайдаеван тIварунихъ ягъуниз талукьарнавай шадвилин мярекат кьиле фена. Ана иштирак ийиз Москвадай, Махачкъаладай, республикадин шегьеррайни районрай чIехи дережадин руководителар, алимар, писателарни шаирар – вишералди мугьманар атанвай.
Шадвилин мярекат, сифте гаф рахуналди, «Сулейман-Стальский район» муниципальный тешкилатдин Кьил Имам Музамудинович Яралиева ачухна ва кьилени тухвана.
И. М. Яралиева къейд авурвал, кьуд пата къацу либас алукIнавай, таму-тара цуьк ахъайнавай къенин юкъуз, Ватандин ЧIехи дяведа гъалибвал къазанмишна 64 йис тамам жезвай суварин вилик Шайдаеврин хзанди чи гележег тир аялар, хуьруьнвияр патал еке савкьват авуна – абуру чпин такьатралди эцигнавай УСЦ-дин чIехи ва гуьзел дарамат эцигна, къе ишлемишиз вахкузва. Дараматни зурба алим, 18 ордендин ва 20-далай виниз медалрин сагьиб рагьметлу Мегьамед-Гьанифа Шайдаеван тIварцIиз язава.
Вичин рахунра И. М. Яралиева и дарамат эцигуник ва ам кардик акатуник райондин руководстводини куьмекар гайидакай, кьилди къачуртIа, мебель къачурдакай, имаратдин вилик квай майданда къир цайидакай лагьана.
Рахунрин эхирдай Шайдаеврин хзандиз баркаллу кардай чухсагъул лугьунихъ галаз санал, центрдиз кьуршахар кьадай гьасирни пишкешна. Гаф Дагъустан Республикадин Госсекретарь Такибат Алаудиновна Магьмудовадиз гана.
- Къадим ва вичихъ баркаллу тарих авай Цмуррин хуьряй акъатай Шайдаевар, абуру халкь, республика, уьлкве патал авур ва ийизвай крар неинки Дагъларин уьлкведа, гьакI чи зурба ва къудратлу уьлкведани гзафбуруз хъсандиз чизва, - лагьана Т. А. Магьмудовади. – Республикадин руководстводи акьалтзавай несилдиз чирвилер ва тербия гунин кIвалах хъсанарун, спортдин ва физкультурадин кIвалах вилик тухун патал Имам Музамудиновича районда тухузвай кIвалахдин тереф хуьзва. И кардик пай кутунай Шайдаеврин хзандизни за Дагъустан Республикадин Президент Муху Алиеван, Халкьдин Собранидин Председатель Мегьамед Сулейманован, Гьукуматдин Председатель Шамил Зайналован ва кьилди жуван патай чухсагъул лугьузва, цмурвийриз, вири районэгьлийриз къенин мярекат мубаракзава.
Цмуррин хуьруьн поселенидин кьил Р. А. Алибеговади шадвилин мярекатдал Шайдаеврин тухумдикай, абуру кIвалахда, илимда къазанмишнавай агалкьунрикай, абуру хуьр патал авур баркаллу гзаф крарикай гегьеншдиз суьгьбет авуна. Ам и дарамат вичин тIварцIихъ янавай рагьметлу Мегьамед-Гьанифа Гьажибалаевичан уьмуьрдин ва зегьметдин рекьел иллаки гегьеншдиз акъвазна. Рахунрин эхирдай Р. Алибеговади жемятдин тIварунихъай Шайдаеврин хзандиз чухсагъул малумарна.
КIелунинни спортдин Центр ачухзавай мярекатдал Шайдаевриз чухсагъулдин хуш келимаяр гваз РД-дин Халкьдин Собранидин депутат, академик Гь. Мегьамедов, Махачкъала шегьердин мэрдин заместитель – Ленинский райондин администрациядин кьил Ш. Омаров, РФ-дин «Россиядин Патриотар» партиядин Дагъустандин региональный отделенидин председатель Э. Хидиров, Шайдаеврин хзандин кIеви дуст, и имарат эцигуник вичин пайни кутур Москвада яшамиш жезвай карчи О. Муртузалиев, филологиядин илимрин доктор Г. Шайдаева, райондин художественный школадин директор Я. Рамазанов, Цмуррин юкьван школадин директор Н. Агъабегов, школадин 8-классдин ученица Э. Абумислимова, шаир Сажидин, агъсакъал А. Ягъибегов, дарамат эцигдайла прорабвал авур Ш. Аллагьвердиев ва гзаф маса юлдашар рахана.
Гаф генерал-майор, алим Гьажикъурбан Гьажибалаевич Шайдаеваз гана.
- Ата-бубайрин девиррилай чи халкьдин са хъсан адет ава – рекьер туькIуьрдай, муькъвер, герек дараматар эцигдай, - лагьана Гь. Шайдаева. – Чи хзандини бубайрин баркаллу и адет давамарун кьетIна. Чун хуьре кIелунинни спортдин Центр патал дарамат эцигунин меслятдал атана. Чи мурад кьилиз акъатна, и кардал чна шадвални ийизва. И карда еке куьмек гайи Имам Музамудиновичаз, амай вири юлдашриз чна рикIин сидкьидай чухсагъул лугьузва.
Шадвилин мярекатдал хуш келимаяр, шад легьзеяр гзаф хьана. Рахунрилай гуьгъуьниз Т. А. Магьмудовади, И. М. Яралиева, Гь. Гь. Шайдаева лент атIана, кIелунинни спортдин Центр ачухна. Мугьманар дараматдиз гьахьна, адахъ галаз мукьувай таниш хьана.
Эхирдай райондин Культурадин, аялрин яратмишдай кIвалерин художественный коллективри саналди гьазурнавай концертдин чIехи программа къалурна.
И юкъуз УСЦ-дин дараматдин спортдин гегьенш залда волейболдай райондин хуьрерин командайрин арада акъажунарни кьиле фена.