Сулейман-Стальский район Республики Дагестан
www.old.suleiman-stalskiy.ru

ЧIехи Гъалибвилин 64 йис

«... Ингье мад сад цуькверик кваз тухузва. Адахъ кьиникь галукьнава, гуьлле хьиз. Ветеранри къе гьар са югъ къачузва, Душмандив гвай эхиримжи тепе хьиз». (М. Бабаханов. «Итимрин гатфар»)

Эхь, шаирди лагьайвал, вахтуни вичин кар ийизва. Ватандин ЧIехи дяведа миллионрин чанаралди къазанмишай ЧIехи Гъалибвилин Югъ къвердавай яргъа хьунихъ галаз чи ветеранрин жергеярни йисалай-суз кьери жезва. Гьавиляй къе чи арада амай дяведин ветеранар гьакьван сейли ва багьа я. Чун гьабуруз гьамишалугъ яз буржлу я.
Дуьньядин тарихда ахьтин вакъиаяр ава хьи, вахтар алатуникди абурун метлеб тIимил жедач ва абур рикIелайни фидач. Ахьтин вакъиайрин арада гитлерчийриз акси коалициядин уьлквейри Дуьньядин кьвед лагьай дяведа Германиядин ва адан союзникрин винел къазанмишай Гъалибвили кьетIен чка кьазва.
1941-йисан 22-июндиз фашистрин Германияди ва адан терефдарри чи уьлкведал хаинвилелди вегьейла башламиш хьайи Ватандин ЧIехи дяве 1418 юкъуз давам хьана ва 1945-йисан 8-майдиз душманди рей гунал куьтягь хьана.
Чи уьлкведин тарихда ам виридалайни четин дяве тир, ада миллионралди инсанар пучна, адалай гуьгъуьниз агъзурралди хуьреринни шегьеррин харапIаяр амукьна.
ЧIехи дяведа Ватан хуьник вичин пай кутун тавур хзан бажагьат жагъида. ВикIегь, намуслу, чпин пак буржи тамамаруникай кьил къакъуд тавур инсанар гьич садрани рекьидач. Абур эбеди яз чахъ галаз амукьда.
ЧIехи Гъалибвилиз талукь мярекатар райондин вири хуьрера, школайра, гьар са хзанда кьиле фена. Ингье ЧIехи Гъалибвилин Югъ чIехи, багьа, истеклу сувар яз райондин центрдал иллаки шад гьалара, районэгьлийрин чIехи иштираквал аваз кьиле фена. Адет тирвал, чи районэгьлийри и сувар Ватандин ЧIехи дяведа телеф хьайибур эбеди яз рикIел хуьнин лишан яз, Кьасумхуьруьн агъа кьилихъ эцигнавай пак гуьмбетдин патав тухузва.

Адрес статьи: http://old.suleiman-stalskiy.ru/?com=articles&page=article&id=630