Сулейман-Стальский район Республики Дагестан
www.old.suleiman-stalskiy.ru

ЧIехи шаирдин юбилейдин гьуьрметдай

Малум тирвал, вичин яратмишунралди неинки лезги халкь, гьакI Дагъустанни вири дуьньядиз машгьур авур чIехи шаир, ХХ асирдин Гомер СтIал Сулейманан 140 йисан юбилейдин гьуьрметдай алай 2009-йис Сулейманан йис яз малумарнава. И лишанлу вакъиадиз талукьарна гзаф чкайра шадвилин мярекатар, кIелдайбурун конференцияр, конкурсар кьиле тухузва. Идалди адан яратмишунрал рикI алайбуру чпин патай чIехи шаирдиз авай гьуьрмет, сейливал къалурзава.

Чи райондин са жерге идарайрин ва гьакIни яратмишдай интеллигенциядин векилрин иштираквални аваз и йикъара (13-майдиз) къунши Хив райондин КьванцIилрин хуьре СтIал Сулейманан 140 йисан юбилейдиз талукьарна шадвилин еке мярекат хьана. Ам и хуьре гьеле 1977-йисуз чIехи шаирдин тIварунихъ галай колхоздин председатель Исмаилов Жарулагь Мирзабеговичан чалишмишвилерин нетижада эцигнавай чи машгьур скульптор Гьейбат Гьейбатова буьруьнждикай туькIуьрнавай СтIал Сулейманан гуьмбетдин патав кьиле тухвана.
Анаг, талукь лозунгарни яна, суварин къайдада туькIуьрнавай Сулейманан ватанэгьлияр Хив райондин муниципальный тешкилатдин администрациядин кьил Мухтар Мирзоевич Бирембегова, РУО-дин начальник Меликов Къачмаз Меликовича, КьванцIилрин хуьруьн администрациядин кьил Агъабегов Ярагьмед Къумбатовича, культурадинни информациядин управленидин начальник Мегьамедов Алиди, хуьруьн агъсакъалри, аялрини цуькверин кIунчIар гуналди, хушвилелди кьабулна.
Гуьмбетдал цуьквер эцигна, и мярекат рикIел аламукьун патал анал шикилар ягъайдалай гуьгъуьниз, шадвилин мярекат, атанвай мугьманар тебрик авуналди, шаирдикай куьруь гаф рахуналди, Мухтар Мирзоевича ачухна ва кьиле тухвана. Анал чIехи шаирдин уьмуьрдикай ва яратмишунрикай, адан бажарагъдикай Къачмаз Меликова, хуьруьн мектебдин муаллим М. Айвазов, шаирдин гуьмбет эцигай ва ачухай гьалдикай агъсакъал Жарулагь Исмаилова хуьруьн мектебдин муаллим М. Айвазова куьруь суьгьбетар авуна.
Чи райондин делегациядин патай анал шаирдин гьакъиндай хуш келимаяр, шаирдиз бахшна кхьенвай чпин ва масабурун шиирар, арифдарри, чIехи шаирри СтIал Сулейманан гьакъиндай лагьай гафар гваз РУО-дин начальникдин заместитель Къачабег Аминов, гьевескар композитор Майина АбдулмутIалибова, шаирар тир Сажидин, «Лезги газетдин» хсуси корреспондент Шагьабудин Шабатов, Зумрият Жабраилова, Вадим Жамалдинов, «Куьредин ярар» общественный культурный центрдин комитетдин председатель Агьмедпаша Агьмедпашаев, «Куьредин хабарар» газетдин культурадин отделдин зеведиш, ЛПС-дин райотделенидин председатель Абидин Камилов ва масабур рахана.
Анал кIватI хьанвайбуру чи райондин культурадин Дворецдин гьевескар манидарар тир Агъарагьим Агъарагьимова, Азим Ризаева, Зухраб Мегьамедова лагьай манияр, чи делегациядин виридалайни гъвечIи иштиракчи Эминхуьряй тир 1-классдин ученик Ровшан Жигерова устадвилелди кIелай СтIал Сулейманаз бахшнавай чIал ва тамамарай мани еке хушвилелди кьабулна.
Анал гьакI и хуьруьн юкьван школадин аялрин са дестеди СтIал Сулейманаз бахшна туькIуьрнавай литературадинни художественный композицияни къалурна. Шадвилер яргъалди давам хьана. Анал кьве патанни векилар гьар 5 йисалай и хуьре СтIал Сулейманаз бахшна ихьтин мярекатар тухунин фикирдал атана.
Ихьтин гуьруьшмишвилери чи кьве къунши районрин ва халкьарин алакъаяр мадни мягькемарунин карда еке куьмек гудайдал са шакни алач.

Адрес статьи: http://old.suleiman-stalskiy.ru/?com=articles&page=article&id=629