Набиев Райсудин тийижир кас неинки хайиди тир Курхуьрел, гьатта райондани белки авач жеди. ГьикI лагьайтIа, асул гьисабдай вичин пеше тир муаллимвиле кIвалахзаватIани ( и рекье адахъ 45 йисан стаж жезва) ам тежрибаллу мухбир-журналистни я. Республикадин ва райондин газетрихъ галаз адан фадлай сих алакъаярни ава.
«Лезги газетдин», «Куьредин хабарар» газетдин чинриз адан тIвар алаз гьар жуьре темайриз, кьилди къачуртIа хуьруьн майишатдин, медениятдинни эдебиятдин, тарихдин месэлайриз талукь, гьакIни хъсан ксарикай, абурун яшайишдикай кхьенвай макъалаяр ва очеркар мукьвал-мукьвал акъатзава. Газетар кIелзавайбуруни абур разивилелди кьабулзава. Райсудин муаллимди вичиз редакцийри гузвай тапшуругъарни вахтунда ва рази жеривал тамамарзава.
Гьар са материал ада талукь шикилни галаз редакциядиз агакьарзава. Идани, адахъ журналиствилин алакьунар мадни жезвайди къалурзава. Чи коллектив адалай пара рази я. Гьа са вахтунда Райсудин муаллимдин устадвилин алакъаяр «Учитель Дагестана» газетдихъ галазни фадлай ава. Иниз ада гзафни-гзаф тебрикдин, мектебдин кIвалахрикай, тежрибаллу муаллимрикай кхьизва ва редакцияди малумарзавай конкурсрани активвилелди иштиракзава.
Гьелбетда, муаллимдин ихьтин хъсан ерияр, кьилиз акъудзавай общественный кIвалах редакцияди фикир ва къимет тагана тазвач. И йикъара Райсудин муаллим «Учитель Дагестана» газетдин редакцияди Грамота ва къиметлу пишкеш гуналди къейдна. Чна адаз награда мубаракзава ва яратмишунин кIвалахра мадни агалкьунар хьана кIанзава.