И йикъара Кьасумхуьруьн ДЮСШ-дин залда СтIал Сулейманан 140-йисаз талукьарна волейболдай турнир кьиле фена. Ана райондин хуьрерин 8 командади иштиракна. Кьве юкъуз къизгъиндаказ кьиле фейи акъажунра кьуд команда полуфиналдиз акъатна.
Финалдин акъажунар СтIал Сулейманан ватанда – АгъастIалрин юкьван школадин спортзалда кьиле фена. Къизгъиндаказ кьиле фейи и акъажунра сад лагьай чка Кьасумхуьруьн ДЮСШ-дин, 2, 3 ва 4-чкаяр Герейханован, Курхуьруьн ва Кьасумхуьруьн командайри кьуна. Сад лагьай чка кьур командадиз 7000, 2,3 ва 4-чкаяр кьур командайриз 5000, 3000 ва 1000 манат пул ва талукь дережайрин грамотаяр гана.
Шаирдин юбилейдин гьуьрметдай азаддиз кьуршахар кьунай райондин школьникрин арада турнир Герейханован хуьрени кьиле фена. Ана 1, 2 ва 3-чкаяр кьур жегьил пагьливанриз грамотаяр, пулунин пишкешар гана. Эминхуьруьн, Кьасумхуьруьн, Герейханован ва маса хуьрерин спортсменрихъ хъсан нетижаяр хьана.