Сулейман-Стальский район Республики Дагестан
www.old.suleiman-stalskiy.ru

Гьуьрметни зегьмет сад авуналди

Вичиз гьахълудаказ къуччагърин дере лугьузвай КIварчагъ дередин хуьрериз гьар сеферда командировкадиз фидайла зи гуьгьуьлар ачух жеда. ТIебиатди гуьзелвал ганва дередиз! Амма, зи фикирдалди, анин виридалайни чIехи девлет мерд рикIер авай, зегьметдал рикI алай, мугьманперес инсанар я. Гьар иниз мугьман хьайила зи ярар-дустарин, танишрин кьадар артух жезва.

Мукьвара Зизикрин хуьруьз фейила, зун зегьметдин ветеран, михьи рикI авай инсан тир Демиров Мегьтихан Гьажимирзоевичахъ ва адан чIехи, гьуьрметлу хзандихъ галаз таниш хьана.
- Зун, хтул, 1933-йисуз лежбер хзанда дидедиз хьана, - лугьузва М. Демирова. – Зегьметдин дадни заз фад чир хьана, саки 40 йисуз за производствода кIвалахна. Дарвилер такуна, четинвилер гьал тавунани амукьнач. Абурухъ галаз рикI шадардай, лугьудайвал, «рагъ хъуьрей» йикъарни зи уьмуьрда тIимил хьанач. Санлай къачурла, масада жува авур кIвалахдик рехне кутан тийидайвал зегьметни чIугуна за, къуни-къуншидихъ, хуьруьнвийрихъ галаз гьуьрметлудаказ, хатурлудаказ кьилени фена зун. ЧIалаз килигдай веледар, хтулар, птуларни ава къе заз. ГьакI хьайила, жуван уьмуьрдилай наразивалдай себебар захъ авач.
«Жуван гъилералди къазанмишай фу незни ширин жеда», - бейнида гьа ихьтин фикир аваз вердиш хьайи М. Демирова вичин зегьметдин рехъ 7-класс куьтягьайдалай гуьгъуьниз 1948-йисуз Сардархуьруьн къаналдал кIвалах авунилай башламишна.
Гуьгъуьнлай М. Демирова Зизикрин Ордженикидзедин тIварунихъ галай колхозда, 1964-йисалай 1990-йисалди республикада кIвенкIвечибурукай сад тир «Коммуна» совхозда рабочийвиле кIвалахна.
- Гьа йисара, санлай совхозди хьиз, за кIвалахзавай Тагьиров Шагьабудин кьиле авай бригададини уьзуьмлухрин гьар са гектардай 90-100-130 центнер ципицIар кIватI хъийизвай, рабочийри гьар йисуз хъсан премияр къачузвай, - рикIел хкизва М. Демирова. – Гьикьван лагьайтIани, халкьдиз кIвалах авай, зегьметди арадал гъайи нетижайри шадвал кутадай вахтар тир.
Яргъал йисарин намуслу зегьметдай Мегьтихан Гьажимирзоевичаз «Зегьметдин ветеран» медаль, «Соцсоревнованида гъалиб хьайиди», «Пятилеткадин зарбачи»» знакар, гзаф кьадар грамотаяр ганва.
М. Демирован уьмуьрдин юлдаш Сунахалумни хуьруьнвийриз зегьметдал рикI алай, руьгьдиз ачух дишегьли яз чида. Адани 35 йисуз производствода кIвалахна.
Эвленмиш хьайи 1957-йисалай инихъ Мегьтиханни Сунахалум арада гьуьрмет-хатур аваз яшамиш жезва. И йисара абуру 7 велед – 1 гадани 6 руш хана, хвена, чIехид-гъвечIид чидай, низам авай, зегьметдал рикI алай инсанар яз тербияламишна. Чпин хзанар, кIвал-югъ хьанвай абурун веледар алай вахтунда Махачкъалада, Маллакентда, Герейханован хуьре, Зизика, Экендал яшамиш жезва.
Мегьтихан ва Сунахалум Демироврихъ 18 хтул ва птулни ава. Абуру чIехи дидединни бубадин гуьгьуьлар мадни шадарзава.
И хзанда хьайи 2-3 сятда за кьатIана хьи, ина гьуьрметлувили, хуш рафтарвили агъавал ийизва. Бахт гьавада авач, зегьметдалди къачуз жеда, лагьанай А. Рудакиди. Мегьтихан Гьажимирзоевича ва адан хзанди чIехи бахт – жемятдин патай гьуьрмет -  чпин зегьметдалди къазанмишна.

Адрес статьи: http://old.suleiman-stalskiy.ru/?com=articles&page=article&id=610