Пакаман сятдин 9 даз, 1-классдин, гьакIни выпускной классрин аялар «Выпускник-2009» гафар кхьенвай лентерни къуьнуьз вегьена, чпин классрин руководителарни кьиле аваз, школадин гьаятда шадвилин линейкада акъвазна.
Музыка ва школадин уьмуьрдиз талукьарнавай мани куьтягь хьайила, микрофондихъ тешкиллувилин кIвалахдин рекьяй школадин директордин заместитель А. Кьасумова ата¬на ва ада выпускной классрин аялар патал школадин эхиримжи зенг ягъуниз талукьарнавай шадвилин линейка ачухун малумарна.
Выпускникрин тIварцIиз хуш келимаяр лагьайдалай гуьгъуьниз шадвилин линейка кьиле тухузвайди тир А. Къ. Кьасумовади сифте гаф кIелунинни тербиядин кIвалахдин рекьяй школадин директордин заместитель Селимова Саимат Мегьамедовнадиз гана.
Ада выпускной классрин аялрин гьакъиндай хуш келимаяр лагьана, насигьатар гана, абурухъ вилик кумай госэкзаменра, гележегдин уьмуьрда, пешекарвилин рехъ хкягъунин карда еке агалкьунар хьана кIанзавайди лагьана ва инлай кьулухъни школадихъ, муаллимрихъ галаз алакъа хуьниз эвер гана.
Гуьгъуьнлай анал тебрикдин хуш кели¬маяр, разивилин ва насигьатдин гафар ла¬гьайдалай гуьгъуьниз школадин директор X. Н. Хаирова кIелунра, спортда ва школа¬дин общественный уьмуьрда тафаватлувилер къалурай са жерге выпускникрив РУО-дин, школадин дирекциядин патай Гьуьрметдин грамотаяр шад гьалара вахкана.
И мярекатда райондин администрациядин Кьилин заместитель Гь. М. Гьажимегьамедова иштиракна ва анал рахана.