23-май. Инин юкьван школадал пакамахъай музыкадин ван алай. Сятдин 9 тамам жедайла анин гьаятда авай чIехи майдандал гъилера цуькверин кIунчIар, чина шадвилин хъвер авай, суварин къайдада алукIна, хъуьчIериз «Выпускник – 2009» гафар кхьенвай яру лентер вегьенвай 11-классар кIелна куьтягьзавай выпускникар, 1-классрин аялар, абурун диде-бубаяр, муаллимар ва и мярекатдиз теклифнавай маса мугьманар кIватI хьана.
Школа акьалтIарзавайбур патал эхиримжи зенг ягъуниз талукьарнавай шадвилин мярекат кьиле тухузвайди тир тербиядин рекьяй и школадин директордин заместитель Н. Женетханов тебрикдин хуш келимайрилай гуьгъуьниз, выпускной классрин аялриз майдандал шадвилин линейкада акъвазун патал буюрна. Сифтегьан классрин аялрин гъилерни кьуна, музыкадин ван кьилеллаз, майдандал къвезвай выпукникар вирибуру, гурлу капар ягъуналди, хушвилелди кьабулна.
Анал сифте гаф гана рахай и школадин директор Б. Н. Ягъибегов 800 далай виниз аялри кIелзавай и мектебдин аялрихъ ва гьа жигьетдай яз 80 кас выпускникрихъ акъайзавай кIелунин йисуз гьам чирвилер къачунин, гьам ахлакьдин рекьяй ва гьамни школьникрин олимпиадайра, маса акъажунра, конкурсра хъсан нетижаяр жезвайди лагьана. Кьилди къачуртIа, къейдна ада, - 80 кас выпускникрикай 14 аялди школа вири предметрай лап хъсан къиметралди акьалтIарнава, абурукайни 3 кас (Р. Абдулфатахова, М. Баламетова ва Н. Эмирбегова) медалралди акьалтIарунин женгиник экъечIнава.
Гуьгъуьнлай ада кIелунра, конкурсра, ахлакьдин рекьяй тафаватлу хьайи, школадин ва райондин общественный уьмуьрда, спортдин рекьяй акъажунра активвилелди иштирак авур са жерге выпускникрив РУО-дин ва гьакIни школадин дирекциядин Гьуьрметдин грамотаяр шад гьалара вахкана.
Выпускникрин, муаллимрин, диде-бубайрин вилик анал тебрикдин хуш келимаяр, насигьатдин гафар гваз депутатрин райондин Собранидин председателдин заместитель, и школадин выпускник, филологиядин илимрин кандидат Абдулмуталибов Нариман Шамсудинович, школадин завуч С. Мирзеханов, «сельсовет Касумкентский» муниципальный тешкилатдин кьил Б. Бремов, гьакIни Османов Фахрудин-гьажи, выпускникрин сифтегьан муаллимрин тIварунихъай А. Къазиева, диде-бубайрин патай А. Седулаева, Р. Фейзулина, выпускной классрин руководителрин тIварунихъай З. Мегьамедова, райондин «Куьредин хабарар» газетдин отделдин зеведиш, шаир А. Камилов рахана.
Выпускникар сад лагьай классрин аялри шиирралди тебрикна. Гуьгъуьнлай анал выпускной классрин аялар чпин муаллимрин тIварцIиз чухсагъулдин хуш келимаяр гваз рахана ва чпи инлай кьулухъни школадихъ галаз алахъа хуьдайди, школадин тIвар хкажун патал чалишмишвалдайди лагьана.
Гуьгъуьнлай анал выпускной классрин аялри 10-классдин аялрив, Россиядин пайдахдик кваз, чирвилерин лишанар-яржар тир шартIунин ктаб ва куьлег шад гьалара вахкана.
Куркурдин ван алаз выпуксникар патал школадин эхиримжи зенг рахана. И гьуьрметдин кар 11-классдин выпускник С. Асалиевални 1-классдин ученик Гь. Абиловал тапшурмишнавай. Выпускникар патал школадин эхиримжи зенг ягъуниз талукьарнавай суварин шадвилер – манияр, кьуьлер – яргъалди давам хьана.