И йикъара Кьасумхуьруьн 2-нумрадин юкьван школада диде-бубайрин собрание хьана. Адан кьилин метлеб аялар ЕГЭ-дин экзаменриз гьазур хьун ва абур хъсан нетижаяр аваз вахкун тир.
Собранида аялрин диде-бубайри, предметный тарсар гузвай муаллимри ва классдин руководителри иштиракна. Анал школадин директор М. Велиева ЕГЭ-дин экзаменра цIинин йисуз хьанвай дегишвилерикай, аялар гьазур жезвай гьалдикай гегьеншдаказ суьгьбет авуна.
Гуьгъуьнлай анал классрин руководителар тир М. Къурбанова, Г. Ибрагьимова ва диде-бубаяр Т. Рамазанова, А. Абдулазизов ва масабур рахана.
Абуру и школада кIвалахзавай муаллимриз вири диде-бубайрин патай чухсагъул лагьана.
П. Мегьамедова