ЧIехи шаирдин музейдин ктабда, иниз атай агъзурралди инсанри Сулейманакай чпин фикирар кхьенва. Заз кьве касдин фикиррал акъвазиз кIанзава.
«Чун мад сеферда Агъа-СтIалдилай тир чIехи дагъустанви, Дагъустандин поэзиядин экуь чирагъ тир СтIал Сулейманан кIвализ мугьман хьанва. Чаз чизва, иниз шаирдал чан аламазни адан гзаф дустар ва мугьманар къвезвай. Ам кьейидалай гуьгъуьнизни иниз инсанар къвезва. Абурун кьадар йисандавай йисуз артухни жезва. Вучиз лагьайтIа, СтIал Сулейманан тIвар, адан яратмишунарни Дагъустандин халкьарин кьисметар сад я».
Расул Гьамзатов, Дагъустандин халкьдин шаир.
«Чун, Москвадай тир шаирар, XX-асирдин Гомер СтIал Сулеймана вичин уьмуьрдин эхиримжи йисар кечирмишай чилел мугьман хьунал гзаф шад я. ЧIехи шаирдин музейда авай гьавадал нефес чIугунал чун гзаф бахтлу я. Чпин шаирар эбеди рикIера хуьзвай халкь са чIавузни рекьидач.
Шагьабудин Шабатов