Алай йисан 31-мартдиз «Сулейман-Стальский район» муниципальный райондин администрациядин нубатдин заседание хьана. Адан кIвалахда администрациядин Кьил Штибег Гьажимегьамедович Мегьамедханова, адан заместителри, администрациядин управленийринни отделрин, районда кардик квай къуллугърин руководителри, хуьрерин поселенийрин кьилери, гьялзавай месэлайрихъ галаз алакъалу къуллугърин пешекарри иштиракна.
Заседание администрациядин Кьил Ш.Гь.Мегьамедханова ачухна ва кьиле тухвана.
Заседанидал агъадихъ галай месэлайриз килигна:
1. Муниципальный райондин территорияда михьивилер авунин ва аваданламишунин кIвалахар тешкилнавай гьалдин гьакъиндай.
2. Муниципальный районда жегьилрихъ галаз кIвалах тухун хъсанарунин гьакъиндай.
3. Жуьреба-жуьре месэлаяр.
Заседанидал сад лагьай месэладай администрациядин архитектурадин, эцигунрин ва ЖКХ-дин отделдин начальник Мустафа Мустафаева информация авуна. Ада къейд авурвал, РФ-дин Гьукуматди тестикьарнавай государстводин санитарный нормайрихъ ва къайдайрихъ галаз кьадайвал, райондин территорияда михьивилер авунин, аваданламишунин, къацу набататар хуьнин рекьерай тайин кIвалах тухузва. И карни районда туькIуьрнавай махсус пландин бинедаллаз тухузва. Кьилди къачуртIа, зирзибилдин площадкаяр къайдада аваз хуьн, алава площадкаяр ва контейнерар эцигун, цин линияр ремонт хъувун, общественный чкаяр, рекьерин къерехар михьидаказ хуьн, къелемар, кул-кусар цун патал ва ихьтин маса кIвалахар тухузва. Кьилди къачуртIа, мукьвал вахтара Кьасумхуьруьн, Кьулан СтIалрин, Алкьвадрин, ЦIийи Макьарин, Герейханован, Агъа СтIалрин, Цмуррин хуьрерин поселенийра 1000-далай виниз декоративный къелемар, кул-кусар цана, 350-далай виниз куьгьне тарар атIана, 500 кубический метр зирзибил кIватIна, тухвана тайинарнавай чкадал гадарна.
Винидихъ тIварар кьунвай хуьрерин поселенийрин территориядал 250-далай виниз коммерческий туьквенар, 98 хсусиятдин жуьреба-жуьре формайрин карханаяр ала, 104 стационарный площадкадал зирзибилдин 207 контейнер эцигнава. Гьайиф хьи, виринра михьивилер авунин кIвалахар тешкилнавай гьалдал разивал ийиз жедач. Алава контейнерар, гьакIни абур эцигдай площадкаяр туькIуьру-нин, агьалийрин арада михьивилер авунин ва хуьнин патахъай гъавурда тунин кIвалах тухунин, зирзибил вахчунин патахъай «УЖКХ» МУП-динни вири хуьрерин поселенийрин арада икьрарар кутIунин лазимвал ава.
И месэладай заседанидал «УЖКХ» МУП-дин начальник Фазил Мамедяров, «с/с Герейхановский» хуьруьн поселенидин кьил Изамудин Мирзаметов, «село Ортастальский» хуьруьн поселенидин кьил Муслим Альдеров, райондин администрациядин кьилин 1-заместитель Лацис Оруджев рахана.
Заседанидал алай кьвед лагьай месэладай физический культурадин, спортдин ва жегьилрин крарин рекьяй отделдин начальникдин везифаяр тамамарзавайди тир Руслан Гьажалиева информация авуна. Малум хьайивал, эхиримжи вахтара районда спортдин ва физкультурадин кIвалахриз кьилин фикир гузва.Районда кардик квай 4 ДЮСШ- да 2100- далай виниз гадайрини рушари спортдин жуьрейрай вердишвилер къачузва, чпин устадвал хкажзава.Самбодай, дзюдодай, армспортдай, боксдай, кьуршахар кьунай райондин спортсменрихъ иллаки еке агалкьунар жезва. Районда спортдин акъажунар, жуьреба-жуьре турнирарни тухузва.
Райондин депутатрин Собраниди тешкилай 25 касдикай ибарат тир жегьилрин парламентдини тайин кIвалах тухузва.
Гьа са вахтунда, и ва авунвай, тухуз алакьнавай маса кIвалахри-кай лугьунихъ галаз санал, Руслан Гьажалиев гьялиз тахьанвай месэлайрални гегьеншдиз акъвазна.
И месэладай Кьасумхуьруьн 1-нумрадин ва Эминхуьруьн ДЮСШ-дин директорар тир Сергей Мирзалиев, Абдулнасир Мегьамедкеримов, Кьасумхуьруьн самбодинни дзюдодин ДЮСШ-дин тренер-преподаватель Тельман Къурбанов, администрациядин Кьилин заместителар Савин Велиев, Гьажиагьмед Гьажиагьмедов рахана.
Заседанидин нетижаяр кьуналди, Штибег Гьажимегьамедович Мегьамедханова анал гьялай месэлайрин важиблувал къейдна, кIвалахар хъсанардай, рехъ гузвай кимивилер арадай акъуддай меслятар къалурна.