19-мартдиз къадим Дербент шегьерда Кьиблепатан Дагъустандин шегьеррин ва районрин муниципальный СМИ-рин кIвалах хъсанаруниз талукьарна зонадин семинар-совещание кьиле фена. Ам ДР-дин печатдин ва информациядин министерстводи тешкилнавайди тир. Аниз гьакI Кьиблепатан Дагъустандин муниципальный районрин Кьилеризни теклифнавай.
Семинар-совещанидал, адан макьсаддикай куьрелди лугьуналди ва аниз атанвайбур тебрик авуналди, сифте Кьиблепатан Дагъустанда ДР-дин Кьилин тамам векилвилер гвайди тир Велимурадов Мусаэфенди Абдулмежидович рахана.
Гуьгъуьнлай анал алай месэладай печатдин ва информациядин рекьяй ДР-дин министр Аджиев Азнаур Чингисхановича куьруь доклад авуна. Ада вичин докладда СМИ-рин кIвалах алай девирдин истемишунрин дережадиз акъудун патал муниципальный районрин руководителрин вилик акъвазнавай еке жавабдарвиликай, муниципальный СМИ-ри чпихъ артуханвал авай проектар уьмуьрдиз кечирмишун кьиле физвай гьалдикай агьалияр гегьеншдаказ хабардар авунихъ галаз санал, абур дуьз гъавурда тунин, культурадин йис кьиле тухунин месэлайризни кьетIен фикир гун чарасуз тирдакай лагьана.
Ада ва адалай гуьгъуьниз анал рахай адан заместителри, гьакIни «Дагестан» ГТРК-дин ва РГВК-дин руководителри ва маса пешекарри муниципальный районрин чкадин газетрин, сайтрин ва телевиденийрин кIвалахдиз къимет гана, меслятар къалурна.
И месэладай анал рахай чи муниципальный райондин Кьил Нариман Шамсудинович Абдулмуталибова, чи райондин сайтдин кIвалахдин жигьетдай лагьай са бязи гафар гьакъикъатдихъ галаз дуьз кьан тийизвайди къейд авунихъ галаз санал, вичи адан кIвалахдал гьамиша гуьзчивал тухузвайди, материаларни, маса районрив гекъигайла, чи сайтди гзаф гузвайди, гьа са вахтунда абурукай республикадин СМИ-ри бес кьадар менфят къачун тийизвайди, гьатта республикадин метлеб авай мярекатрикайни гун тийизвайди, гьакъсуз критикадин кIвалахрихъ къекъвезвайди лагьана.
Эхирдай анал гьялай месэладай талукь къарар кьабулна.
Семинар-совещанидилай гуьгъуьниз СМИ-рин гьар хилен пешекаррин секцийрин кIвалах кьиле фена.
А. Камилов