Испикрин юкьван школа алатай 2013-йисуз лезги ва Дагъустандин халкьарин са жерге шаиррин ва писателрин юбилеяр къейд авуналдини тафаватлу хьана. И жергедай яз Етим Эминан 175, Хуьруьг Тагьиран 120, Расул Гьамзатован 90 йисарихъ галаз алакъалу юбилеяр.
Лезги чIал, литература, адан тарих акьалтзавай несилдиз кIанарунал, чирунал алахъзавай гьар са тарс классра кIелзавай аялри югъ-къандавай хушвилелди кьабулзава. И карди муаллимрик, гьевесни кутазва, луварни. Лагьана кIанда, 9 - классда зи гъилик лезги чIалайни литературадай чирвилер къачузвай са бязи аялри ( 9-классдай - Шихагьмедова Риана ва Ханова Заира, 8-классдай - Жамалов Шалбуз) чпин адетдин тарсариз гьазур хьунилай гъейри, и цIарарин автордин гуьзчивилик кваз шиирар кхьинрални машгъул я. Ачух, азад темайрай кIвализ тапшуругъар яз шиирар, рассказар, сочиненияр, изложенияр кхьиз зав вахкузвай аялрин кьадарни акваз-такваз гзаф жезва, кIвалахрин ерини. Абурун кIвалахар - шиирар, рассказар, сочиненияр, - чIалан, литературадин жигьетдай муаллимдихъ галаз санал анализ ийиз, лазим тир кIалубриз гъиз, класс мукьвал-мукьвал эдебиятдин бегьер гъизвай багьдиз элкъвезва. Муаллимдиз вичин гъилик чирвал къачузвай аялар кьакьан дережайрихъ агакьунилай багьа кар ава жал?!