Чуьхверхуьрелай тир армспортдай спортдин лайихлу мастер, Россиядин, Европадин ва дуьньядин чемпион, Россиядин Федерациядин лайихлу тренер Малик Тагьирбегован тIвар спортдал рикI алайбуруз хъсандиз таниш я. Вичи армспортдай тухузвай чIехи дережадин чемпионатрани турнирра иштиракун давамарни ийиз, ада хуьре ачухнавай Герейхановский ДЮСШ-дин филиалда тренервилени кIвалахзава.
Малик Тагьирбеговахъ галаз тренервиле адан ученик, спортдин лайихлу мастер, пуд сеферда дуьньядин чемпион Рамидин Къазиагьмедовани кIвалахзава. Гьа са вахтунда, Рамидинани спортдин акъажунра иштиракун давамарзава.
Алай вахтунда машгьур спортсменрин-тренеррин гъилик 35 касди армспортдай вердишвилер къачузва ва чпин устадвал хкажзава. Шад жедай кар я хьи, са шумуд касдикай Россиядин, Дагъустан Республикадин кIвен-кIвечивал патал тухвай акъажунрин, чемпионатрин гъалибчиярни призерар хьанва.
Малик Тагьирбегова чаз лагьайвал, алай йисни адан тербиячийри са шумуд турнирда ва чемпионатра агалкьунар къазанмишунилай башламишна. ИкI, 15-19-январдин йикъара Махачкъала шегьерда Дагъустан Республикадин кIвенкIвечивал патал жаванрин ва жегьилрин арада акъажунар кьиле фена. Ана Эрзиман Алисултанова (ам Россиядин кIвенкIвечивал патал тухвай акъажунрин чемпионни я), Радим Таривердиева, Ризван Мегьамедова, Гьамзат Садикьова 1, Мегьамедкьасум Таривердиева (ам Россиядин чемпионатдин 3-призер я), Агьмед Къурбанова, Наидин Ягьяева, Къадир Алисултанова, Муслим Эмиргьамзаева 2, Самрат Къараханова, Шарип Гьажимурадова 3-чкаяр кьуна.
Январдин вацран эхирра Дербент шегьерда чIехибурун арада кьиле фейи Дагъустан Республикадин чемпионатдани филиалдин тербиячийри агалкьунар къазанмишна. Кьилди къачуртIа, Гьажи Керимов, Манаф Гьасанов, Эрзиман Алисултанов 1, Зейнал Бабаев, Алисултан Алисултанов 2, Эрзиман Магьмудов 3-чкайриз лайихлу хьана.
Эрзиман Алисултанова 6-9-февралдин йикъара Екатеринбург шегьерда жаванрин арада Россиядин кIвенкIвечивал патал тухвай акъажунрани иштиракна. Ана Эрзимана 2-чка кьуна.
-Чи тербиячийри республикадин ва Вирироссиядин маса турнирра, чемпионатрани иштиракда,- давамарзава ихтилат Малик Тагьирбегова.- Идалайни гъейри, захъни Рамидин Къазиагьмедовахъ сентябрдин вацра кьиле фидай дуьньядин чемпионатда иштиракдай къастни ава. Мумкин я ана чи тербиячийрикай мад сад-кьве касди иштиракун.
Къазанмишнавай агалкьунар мубарак авуналди, чаз чпиз гьахълудаказ гъилера къуват авайбур лугьузвай армрестлингдай спортсменрихъ мадни еке агалкьунар хьун кIанзава.
Хазран Кьасумов