«…Эцигзава, эцигзава, цIийи хъийиз, эцигзава…» - гуя и гафар Алибег Фатахова къенин йикъара районда, кьилди къачуртIа Кьасумхуьрел кьиле тухузвай эцигунар, аваданламишунин рекьерай тамамарзавай кIвалахар фикирда аваз кхьенва. Райцентрадин агьалияр ва адан мугьманар шагьидар хьанвайвал, гатфарин сифтегьанди тир мартдин варз алукьуникди Кьасумхуьрел общественный дараматрин патарив, рекьерин къерехрив гвай, фад акIурнавай, «кьуьзуь» хьанвай тарар атIузва. ИкI, почтадин, административный пуд мертебадин дараматрин патарив гвай, райондин баркаллу рухвайринни рушарин шикилар тунвай «Баркалладин доскадин» вилик квай, гьакIни рекьерин къерехра авай хейлин тарар атIанва. Абуру дараматрин акунарни далдадик кутазвай, аваданламишунин жигьетдай алай аямдин истемишунриз ва къайдайриз жавабни гузвачир.
Куьгьне тарар атIай чкайра цIийи, гуьрчег аквадай къелемар акIур хъийида.
Райондин центр аваданламишунин рекьяй тухузвай кIвалахрикай рахадайла, ЦIийи поселокда ЦРБ-дин дараматдилай сбербанкдал кьван рекьин къерех тирвал туькIуьрнавай парк-аллеяда гуьрчег аквадай къелемар цанвайдини къейд авун лазим я.
Райондин центрадал ва адан микрорайонра куьгьне хьанвай тарар атIунин кIвалахар давам жезва.
Райондин 85 йис тамам хьунин юбилейдихъ галаз алакъалу яз ва субботникар тешкилуналди куьгьне тарарикай азад хьайи чкайра, шегьре рекьин ва куьчейрин къерехра гуьрчег аквадай, тIебиатдин чкадин шартIариз дурум гудай тарарин къелемар, кул-кусар акIурун гатфарин ва зулун варцара кьиле тухуда.
Гзаф йисарин ва баркаллу тарих авай Кьасумхуьр «жегьил» хъувунин ва аваданламишунин рекьерай райондин руководстводи ва «сельсовет Касумкентский» хуьруьн поселениди тухузвай кIвалахдин тереф агьалийри кIевелай хуьзва ва райцентр къвердавай авадан хьунал шадвалзава.
Хазран Кьасумов