Сулейман-Стальский район Республики Дагестан
www.old.suleiman-stalskiy.ru

ЦIийи йисаз – цIийи умудар аваз

Ингье, 2013-йисни вичин тарихдиз фена. Ам, чи район экономикадин, социальный, культурадин рекьерай вилик финин жигьетдай лишанлуди хьайиди хьиз, чи редакциядин коллектив патални бегьерлуди хьана.

 Вичин тешкилатчи райадминистрация  тир чи райондин общественно-политический газет «Куьредин хабарар» адан коллективди вахт-вахтунда акъудун ва вахтунда агьалийрал агакьарун таъминарна. План тир 52 нумрадин чкадал алатай йисуз 72 нумра газетар акъудна. Райондин уьмуьрда кьиле физвай важиблу вакъиаяр, лишанлу мярекатар, жезвай агалкьунар ва гьакIни авай кимивилер къейд авунихъ галаз санал, газетди РФ-дин ва ДР-дин са бязи Законар, Гьукуматрин, муниципальный райондин, райондин депутатрин Собранидин, администрациядин  къарарар райиж авунин ва абур уьмуьрдиз кечирмишунин  жигьетдай талукь кIвалах тухвана. Гьелбетда, чаз чи кIвалах вилик тухунин карда гьам пулунин герек такьатар чара авуналди, гьамни дуьз меслятар къалуруналди муниципальный райондин Кьил Абдулмуталибов Нариман Шамсудиновичан патай еке куьмек хьана. Райондин руководстводихъ галаз агьалийрин чарарин алакъа ва гьакIни гуьруьшмишвилер мягькем хьуни гзаф йисара гьялиз тахьанвай са жерге месэлаяр къарагъардай ва талукь серенжемар кьабулдай мумкинвал хьана.

Газетдин чинра жуьреба-жуьре месэлаяр къарагъарунин жигьетдай чи куьмекчияр-чи газетдин «вилерни япар» тир хуьрерин мухбиррикай еке куьмек жезва. Абурун жергедай яз къе   чахъ галаз гзаф йисара сих алакъа хуьзвай, чи умудлу даяхар тир Сажидин Саидгьасанован, Майина Абдулмуталибовадин, Шагьабудин Шабатован, Мегьамед Мегьамедован, Эйзудин Сайдумован,  Саид Саидован, Райсудин Набиеван, Зейнулагь Наврузован, Замир Мегьамедован ва масабурун тIварар еке гьуьрметдивди кьаз кIанзава ва абуру алукьнавай цIийи йисузни и алакъа мадни мягькемардайдак умуд кутазва. Чна абурулай, хуьрера кьиле физвай хъсан кIвалахрикай хьиз, авай кимивилер арадай акъудунихъ, герек меслятар къалурунихъ рекье тунвай макъалаярни гуьзлемишзава. Эхь, газет анжах са ана кIвалахзавай журналистринди туш, ам вири халкьдин газет я, ада райондин агьалийрин вири къатариз къуллугъ авун, и жигьетдай куьмек гун, дуьз рехъ, меслят къалурун герек я.
Алукьнавай 2014-йис чи райондин уьмуьрда са жерге лишанлу вакъиайралди девлетлу я: цIи чи район тешкилайдалай инихъ 85 йис, чIехи алим-тарихчи ва камалэгьли Алкьвадар Гьасан-эфендидин 180 йис, Дагъустандин халкьдин шаир СтIал Сулейманан 145 йис, шаир ва фронтовик СтIал Мусаибан 100 йис, шаир ва халичайрин магьир устIар Мислимат Агьмедпашаевадин 90 йис, чи республикада ва уьлкведа машгьур алимар-илимрин докторар тир Абдусалам Гьуьсейнованни Унейзат Мейлановадин 80 йисар, Дагъустандин халкьдин артист Ибрамхалил Ибрамхалилован 70 йис тамам жезва. Чи вилик и жигьетдай къейд ийидай са жерге маса месэлаярни акъвазнава. Райондин руководстводин ва талукь маса къуллугърин куьмекни галаз чна абур галай-галайвал ва вини дережада аваз кьилиз акъуддайдак ва и кардал агьалийрин гегьенш къатар желб ийидайдак кIевелай умуд кутазва.
Алукьнавай цIийи йис Россиядин Федерацияда культурадин, яни медениятдин йис яз малумарнава. И кардини культурадин хиле кIвалахзавай вири работникрин вилик, гьа жигьетдай чи редакциядин коллективдин виликни еке ва жавабдар везифаяр эцигзава.  Чпиз райондин руководстводи  вири шартIар яратмишнавай редакциядин работникрилай абур агалкьунралди кьилиз акъудиз жедайдал шак алач.
Ингье, алай йисан чи газетдин нубатдин 4-нумра 1330 экземплярдин кьадарда аваз акъатзава ва газет акъудиз эгечIай 1931-йисалай башламишна къенин йикъалди акъуднавай газетдин нумрайрин умуми кьадарди 25948 тешкилзава. Эхь, чи райондин газет тарихдин яргъал ва баркаллу рехъ фенва, и кардал гьар са районэгьлидивай дамах ийиз жеда. Гьа са вахтунда, шаирринни камалэгьлийрин макан тир чIехи шаир СтIал Сулейманан тIварунихъ галай 60 агъзурдахъ агакьна агьалияр яшамиш жезвай районда 2 агъзур газет кьванни кхьин тавун тажуб жедай кар я. И карди чун хайи дидед чIал, чи бубайрин баркаллу крар ва адетар хуьнив чун эгечIзавай гьалдин гьакъиндай ачухдиз  шагьидвалзава. Гьар дережайрин къуллугърин руководителри и кардиз фикир гун герек я.
Вири районэгьлийриз алукьнавай ЦIийи йис мубарак авунихъ галаз санал чаз абурухъ чандин сагъвал, кIвалахда агалкьунар, хзанрани бахт, берекат хьана кIанзава. Квехъ виридахъ балкIандин къуват, кьатIун ва вафалувал хьурай!
 
Адрес статьи: http://old.suleiman-stalskiy.ru/?com=articles&page=article&id=4639