Алатай гьафтеда Кьасумхуьрел, Ибадуллагь Гьажимирзоевич Тагьирован тIварунихъ галай культурадин Дворецда, «Сулейман Стальский район» муниципальный районда Культурадин йис ачухуниз талукьарнавай мярекат кьиле фена.
Ана райондин администрациядин жавабдар работникри, идарайринни организацийрин, общественный тешкилатрин руководителри, культурадинни искусстводин векилри, гьакIни райондин хуьрерай атанвай гзаф кьадар инсанри иштиракна.
Мярекатдин макьсаддикай куьрелди лугьуналди, ам машгьур культработник ва конфераньсе Ярагьмед Ярагьмедова ачухна ва кьиле тухвана.
Районда Культурадин йис ачухунин сифте гаф муниципальный райондин администрациядин Кьилин заместитель Савин Велиев рахана. Ада къейд авурвал, 2013-йисан 12-декабрдиз РФ-дин Президент Владимир Путина РФ-дин Федеральный Собранидиз раиж авур Чарче обществода адетдин культурадин ва марифатдин роль кьетIендаказ къейднава. Россияда, гьабурукай яз Кьасумхуьрелни, халкьарин адетдин культурадин центраяр тешкилна. Идалайни гъейри, Россиядин Федерацияда 2014-йис Культурадин йис яз малумарнава. Идахъ галаз алакъалу яз, чи республикада Культурадин йис бегьерлудаказ кьиле тухунин мураддалди еке программа туькIуьрнава, адан бинедаллаз культурадинни тарихдин ирс вилик тухунихъ ва пропаганда авунихъ элкъуьрнавай серенжемар кьиле тухуда.
-Муниципальный райондин Кьил Нариман Шамсудинович Абдулмуталибован къул алаз акъуднавай Постановленидин бинедаллаз районда Культурадин йис кьиле тухун патал тешкилдай мярекатар тайинарнава,-давамарна Савин Велиева.- Культурадин ва яратмишунрин жигьетдай райондихъ девлетлу тарих, адетар ава. Алатай вахтарин ивирар къадирлудаказ хуьналди, районда руьгьдин ивирар, марифатлувал ва меденият мадни виниз хкажда, артухарда. ЦIинин йис район патал мадни ихьтин краралди тафаватлу я: 2014-йисуз райондин 85 йис, Алкьвадар Гьасан-эфендидин 180, СтIал Сулейманан 145, СтIал Мусаибан 100, уьлкведин машгьур алим-философ, академик Абдусалам Гьуьсейнован 75 йис тамам жезва. Юбилярар чахъ мадни ава. Абуруз талукьарнавай ва Культурадин йисаз талукь яз лишанлу вакъиайрин календарда къалурнавай мярекатар районда вини дережада аваз кьилени тухуда.
Нариман Шамсудинович Абдулмуталибован, райондин Собранидин депутатрин, администрациядин патай рикIин сидкьидай мубарак авуналди, за районда Культурадин йис ачухнавайди яз малумарзава.
Шадвилин мярекатдал райондин агъсакъалрин Советдин председатель Фахрудин Османов, шаир Сажидин Саидгьасанов ва маса юлдашар рахана.
Тебрикдин рахунрилай гуьгъуьниз райондин культурадин Дворецдин гьевескарри, фольклордин ва кьуьлердайбурун «Кюре» ансамблри концертдин чIехи программа къалурна. Милли парталар алаз сегьнедиз экъечIай ва лезги халкьдин манияр устадвилелди тамамарай Дагъустан Республикадин лайихлу артист Омар Меликов, гьевескарар тир Азим Ризаев, Эрзиман Османов, Селимат Гьажиева, Агъарагьим Агъарагьимов тамашачийрин гурлу капариз лайихлу хьана.
Текст кхьейди ва шикилар ягъайди
Хазран Кьасумов я.