Сулейман-Стальский район Республики Дагестан
www.old.suleiman-stalskiy.ru

«…Рагъ авай югъни хурушум аквада»

Социальный, аваданламишунин рекьерай эхиримжи йисара райондин хуьрера хъсанвилихъ еке дегишвилер кьиле фенва. Ида агьалийриз къулайвилер яратмишзава, абурун гуьгьуьлар шадарзава.

 Йисандавай- суз чIехи ва гуьрчег жезвай Кьасумхуьрел эцигунрин, аваданламишунин рекьерай иллаки еке кIвалах тухванва. Гьайиф хьи, са бязи татугайвилери, кимивилери гьа хъсан кIвалахрал «серин» гъизва.

Ингье, чун ЦIийи поселокдин Школьная куьчеда ава. Шегьредилай и куьчедиз гьахьзамазди «Лейла» банкетрин залдин, кафедин, туьквенрин къешенг, гуьрчегдиз эцигнавай дараматар гьалтзава. Абуру, гьакIни куьчедин кьве патани эцигнавай яшайишдин кIвалери, чиле тунвай асфальтди гуьгьуьл шадарзава. Гьа и куьчеда юкьван школа, «Аленушка» тIвар алай аялрин бахчани ава. 2-3 чкадал эцигнавай зирзибил вегьедай контейнерри, мадни дуьз лугьун хьайитIа, анагар чиркинзавай гьалди куьчедин абур, акунар чIурзава. Лугьудайвал, циф гьатайтIа, рагъ авай югъни хурушум яз аквада. И куьчени гьакI я. Сифтедай гьалтзавай контейнерар алай чкадал са кали «вичин югъ няни» ийизвай. Са тIимил мензил фейила, школадивай ва аялрин бахчадивай 100-110 метрдин яргъа, са чкадал пуд контейнер эцигнава, площадка кьванни туькIуьр тавуна, гьакIан чилел. Дугъри я, чун фейила контейнеррай зирзибил вахчунвай, амма патав гвай чка лап чиркин тир, контейнеррин патарив кул-кусрин, шифердин, ракьун кIусар… гадарнавай. Патав гвай цацарини валари (жугъун тирвал экъечIнавай) контейнерар эцигнавай чка зирзибилдин халис хъурт хьиз къалуруниз «куьмек» гузвай.
Школадин ва аялрин бахчадин патарив, куьчейрин юкьварал какатайвал контейнерар эцигун, анагар хъуртариз элкъуьрун дуьз кар жезвани?
 
Текст кхьейди ва шикил ягъайди Хазран Кьасумов я.
 
Адрес статьи: http://old.suleiman-stalskiy.ru/?com=articles&page=article&id=4617