Районда авай «Хзанриз ва аялриз социальный рекьяй къуллугъдай центр (ЦСПСД) ГКУ-дин гуьзчивилик квачир яш тамам тахьанвай аялрин отделенидин пешекарри социальный жигьетдай четинвиле авай, гьакIни гзаф аялар авай, тIимил таъмин тир, акьалтIай четинвиле авай, гуьзчивилик квачир аялрихъ галаз тайин кIвалах тухузва.
Отделенидин кьилин везифаяр яшайишдин жигьетдай аялар четин гьалда авай хзанриз куьмек гуникай, яшайишдин жигьетдай аялар акьалтIай четин гьалда авай хзанрин кIвалах хъсанаруникай, аялрин законлу ихтиярар хуьникай, мярекатар тешкилуникай ва абур тухуникай, яшайишдин жигьетдай акьалтIай четин гьалда авай яш тамам тахьанвай аялар авай хзанар яшайишдинни педагогикадин жигьетдай реабилитация авуникай, аялрин арада пиянискавилинни наркоманиядин профилактика тухуникай ибарат я.
Отделенида яш тамам тахьанвай аялриз тренажерный залда секционный кIвалах тешкилнава, гьар жуьредин кружокар кардик ква, культурно-массовый, суваррин мярекатар тухузва, утренникар, СтIал Сулейманан, Гьасан-эфендидин музейриз экскурсияр тешкилзава.
Гатун вахтунда отделенидин пешекарар къаришмиш хьана яшайишдин жигьетдай акьалтIай четин гьалда авай хзанрай тир яш тамам тахьанвай 14 аял лагердиз ракъурна.
Райондин школайра пешекарри «Наркомания – знак беды», «Я выбираю здоровый образ жизни», «Табак, алкоголь и здоровье» темайрай аялрихъ галаз суьгьбетар, диспутар тухузва. Кьилди къачуртIа, Герейханован 1-нумрадин юкьван школада «Мы против наркотиков, табака и алкоголя» темадай мярекат кьиле тухвана. Ина тербиядин рекьяй школадин директордин заместитель А. Ханвердиева, завуч Э. Магьамдаровади, психолог Р. Ламетовади, социальный педагог Н. Азизовади ва и цIарарин авторди иштиракна.
И школада кIелзавай акьалтIай лап четин гьалда авай хзанра авай 23 аялдиз 11500 манатдин къимет авай алукIдай шейэр, гьакIни Абакароврин хзандиз 2000 манатдин цIийи кIвачин къапар гана.
Газетдикай менфят къачуна заз спонсорвилин рекьяй куьмек гузвай карчияр тир Исрафилов Рустамаз, Саруев Эскендараз чухсагъул лугьуз кIанзава.
Л. Мегьамедова, ЦСПСД ГКУ-дин гуьзчивилик квачир яш тамам тахьанвай аялрихъ галаз кIвалах тухузвай отделенидин заведующий.