Сулейман-Стальский район Республики Дагестан
www.old.suleiman-stalskiy.ru

Метлеблуди хьана

23- январдиз РУО-дин ИМЦ-дин методист Н.М.Мегьамедова кьиле аваз «Новомакинская СОШ» МБОУ-да лезги чIаланни литературадин муаллимрин нубатдин семинар кьиле фена.

 Санлай къачурла, аниз маса школайрай 27 кас атанвай. Ам  райондин УО-дин методист Н.М.Мегьамедовади ачухна. Семинардин кIвалах атанвай муаллимри гьазурнавай ачух тарсарикай, классдилай къеце тухузвай тарсарикайни докладрикай ибарат хьана.

Лагьана кIанда, гьар са доклад кIелай, ачух тарс ва я тахьайтIа классдилай къеце тухузвай тарсар кьиле тухвай муаллимрин кIвалахдиз амай муаллимри къимет гана. Гьелбетда, са бязи муаллимрин ачух тарсарикай, докладрикай гегьеншдаказ рахуниз мажбур жезва. «Эминхюрская СОШ» МБОУ-дин дидед чIаланни литературадин муаллим Ж.Гь. Жигеровади гьазурнавай «Халкьдин мецин яратмишунар, адетар ва тарих лезги халкьдин писателрин эсерра» тIвар ганвай докладдихъ муаллимри еке хушвилелди яб акална. 
Муаллимрини кIелзавай аялри «Новомакинский СОШ» МБОУ-дин директордин заместитель, дидед чIаланни литературадин муаллим Р.М.Мансуровади гьазурнавай Гьажибег Гьажибегован «Адетрин  къармахра», С.Р.Къазимегьамедовадин «Алай девирдин лезги шиират» темайриз талукьарнавай ачух тарсар мана-метлебдин, еридин жигьетдай хъсан хьайиди къейдна. «Ашагастальская СОШ» МБОУ-дин лезги чIаланни литературадин муаллим М.Ш.Ферзилаевади гьазурнавай Арбен Къардашан «Халкьдин чин» темадай кьиле тухвай ачух тарсунилайни ана иштиракай муаллимарни тарс гайи 9-классдин аялар гзаф рази яз амукьна. Муаллим М.Ш.Ферзилаевади шиирралди башламишай тарс шаир Арбен Къардашан «Сулейманаз» ва «Афгъанистан» манияр вичин мецелай тамамаруналди акьалтIарна. 
Семинар ЦIийи Макьарин СОШ-дин дидед чIалан муаллим  Д.П.Мегьамеднабиевади классдилай къеце тухузвай тарс яз  «Шагьабудин Нурдинович Шабатовахъ галаз гуьруьш» тIвар гана гьазурнавай шииррин, музыкадинни сегьнейрин нумрайрикай ибарат тир гуьзел мярекатдалди акьалтIарна. ЧIалан устад муаллим Д.П.Мегьамеднабиевади класс шаирдин  портретдални Ш.Шабатова Ш.Э.Мурадовахъ ва А.Магьмудовахъ галаз санал янавай еке шикилдалди тадаракламишнавай. Мадни муаллимди шаир ва журналист Ш.Шабатоваз тарсунин мярекатдизни теклифнавай. Чеб и мярекатдиз мугьман хьанвай Шихидхуьруьнни Испикрин юкьван школайрин чIаланни литературадин муаллимар тир писатель Нажмудин Шихнабиев ва и цIарарин автор. Шагьабудин Шабатова иллаки еке хушвилелди кьабулна. 6 ва 10-классра кIелзавай рушарини гадайри шаирдин шиирар кIелайдалай кьулухъ, тарс Ш.Н.Шабатоваз гаф гуналди ва адан гафариз кхьенвай «ЦIийи Макьар» мани тамамаруналди ачухна. Дугъриданни, муаллим Д.П.Мегьамеднабиевадин гъилик чирвал къачузвай аялри гьазурнавай сегьнейри вири иштиракчийрин гьевес хкажна. Гьа икI, «Куьн квел хъуьрезва?», «Сапогар», «Холодец Алим» тIварар алай сегьнейра къугъвай   А.Керимова, А.Муслимова, Э.Мегьамедовади, М.Рамазанова, Т.Къазимегьамедова ва мсб. Ш.Шабатован и эсеррин ачух илгьамдинни михьи гьиссеррин, айгьамдинни зарафатдин мана-метлеб тамашачийрив ачухдаказ агакьарна. Мярекат  А.Султановади, А.Камиловади, Н.Ашурбеговади устадвилелди тамамарай «Зегьметчи инсан», «Лацу лиф», «ЦIийи Макьар», манийри мадни гурлу авуна.
Тарсунин эхирдай  Ш.Шабатова РУО-диз, адан ИМЦ-дин методист Н.М.Мегьамедовадиз, ана иштирак авур вири муаллимриз,  дидед чIалай чирвилер къачузвай аялриз, «Новомакинский СОШ» МБОУ-дин директор Ж.К.Абасовадиз чухсагъул лагьана. 
Мярекат   школадин  завуч Р. Идрисовади ана иштирак авур муаллимриз чухсагъулдин  гафар лугьуналди ва Н.Мегьамедовади семинардин нетижаяр кьуналди акьалтIарна.
 
Марсель Ризаев, лезги чIаланни литературадин муаллим. 
Адрес статьи: http://old.suleiman-stalskiy.ru/?com=articles&page=article&id=4613