Сулейман-Стальский район Республики Дагестан
www.old.suleiman-stalskiy.ru

Важиблу месэладиз килигна

27- январдиз «Сулейман-Стальский район» муниципальный райондин администрациядин нубатдин заседание кьиле фена.

 Адан кIвалахда администрациядин кьилин заместителри, управленийринни отделрин руководителри, хуьрерин поселенийрин кьилери, организацийринни образованидин учрежденийрин, гьакIни гьялзавай месэлайрихъ галаз алакъалу идарайрин руководителри иштиракна.

Заседание райондин администрациядин Кьил Штибег Гьажимегьамедович Мегьамедханова кьиле тухвана.
Заседанидал алай асул месэладай-«Наркотический шейэр ишлемишунин ва абуралди алвер авунин вилик пад кьун патал районда 2013-йисуз тухвай кIвалахдин ва 2014-йисуз и рекьерай вилик акъвазнавай везифайрин гьакъиндай» администрациядин кьилин заместитель Савин Велиева информация авуна. Ада къейд авурвал, алатай йисуз «Дагъустан наркотикриз акси я» лишандик кваз районда жуьреба-жуьре культурно-массовый, спортдин мярекатар тухвана, муниципальный райондин Кьил Нариман Шамсудинович Абдулмуталибован эвер гун (видеообращение) раижна, са шумуд чкадал агьалийри хабар гунин чарар вегьедай яшикар эцигна, райондин центрада наркотикриз акси тир плакатар акъудна. Наркотикриз акси кIвалах тухудайла райондин администрацияди райондин прокуратурадихъ, УФСКН-дин районрин уртах отделенидихъ, РОВД-дихъ ва талукь маса къуллугърихъ галаз алакъада аваз кIвалахзава.
И месэладай алава информация авур УФСКН-дин Дагъустан Республикада авай районрин уртах отделенидин начальникдин заместитель Эрзиман Тарланова къейд авурвал, наркоманиядин зиянлувиликай агьалийрин арада гъавурда тунин кIвалах тухвана, канабар ва наркотикар квай маса набататар цанвай чкаяр тайинарна, абур тергна. 2013-йисуз и рекьяй 28 тахсиркарвал дуьздал акъудна, 3 наркопритон тергна. Наркоманиядик азарлу 94 кас учетдиз къачунва. Гзафбуру наркоманиядикай обществодиз авай еке зарар ва хаталувал гьиссзавач-им четин акъвазнавай асул везифа я.
Заседанидал алай месэладай райондин прокурордин заместитель Тимур Яралиев, РУО-дин начальникдин заместитель Къачабег Аминов, ЦРБ-дин кьилин духтурдин заместитель Мегьамед Фаталиев, ЦIийи поселокдин юкьван школадин директор Бег Ягъибегов, КIварчагърин хуьруьн поселенидин кьил Асланбег Сефибегов, 16-нумрадин аптекадин заведующий Ильяс Эмирбегов ва маса юлдашар рахана. 
И месэладай заседанидал талукь къарар кьабулна.
Заседанидал чкадин бюджетдиз налогар кIватIунин, цин къаналар гатфарин чуьлдин кIвалахрив эгечIдалди къайдадиз гъунин ва жуьреба-жуьре маса месэлайризни килигна.
Заседанидин нетижаяр кьуналди, Штибег Гьажимегьамедович Мегьамедханова гьялай месэлайрин важиблувал къейдна, кIвалахар хъсанарунин патахъай талукь къуллугъриз ва руководителриз тапшуругъар гана.
 
Адрес статьи: http://old.suleiman-stalskiy.ru/?com=articles&page=article&id=4610