Дагъустан Республикадин Президент М. М. Мегьамедова Махачкъала шегьерда 15-декабрдиз Дагъустандин халкьарин Съезд эвер гуниз талукь Указ акъуднава. Идакай чи райондин агьалийри вуч фикирзаватIа чна агъадихъ гузва.
Мирзалиев Гьажи Гуьлмегьамедович, 81 йисан яшда авай пенсионер, зегьметдин ветеран: - Гзаф миллетар яшамиш жезвай Дагъустан хьтин чкада гьар вад йисалай съездар тухвайтIа, мадни хъсан жедай. Гьаниз хкязавай делегатарни михьи, халкьдин арада гьуьрмет хатур авай инсанар хьана кIанда. Зун яшлу хьанватIани зи гъиле гьахьтин ихтиярар авайтIа, чи обществодин вири хилер кьунвай коррупциядихъ, бюрократиядихъ галаз женг чIугвадай, сифте нубатда бейкарар кIвалахдик кутадай. Инсанриз кIвалах авач, гьавиляй гзафбуру тахсиркарвилериз кьил язава.
Я хуьре, я шегьерда ийидай кIвалах авачирла, жемятди вуч авурай? Хуьрера общественный майишатар, шегьерра карханаяр тергна, гьатта яр-емиш, гьар йикъан яшайишда герек куьлуь-шуьлуьярни еке къиметрихъ чаз паталай гъизва.
Гила жезвай Дагъустандин халкьарин 3-Съезддал и четин месэлайрал эхир эцигдайдахъ зун инанмиш я.