1998-йисуз Кьасумхуьруьн телевидение (КТВ) кардик акатна. Эхиримжи вахтара адан кIвалахда хъсанвилихъди дегишвилер кьиле фена. Телевидениди агьалийриз къуллугъзава, абуруз райондин уьмуьр вири патарихъай къалурзава. Идан гьакъиндай телевиденидай гузвай передачайрин ва рубрикайрин тIварари ачухдиз шагьидвал ийизва: «Райадминис-трацияда», «Квехъ галаз гуьруьшмиш жезва», «Куь чарарин гелеваз», «Сагъламвилин къаравулда», «Къай-даяр хуьнин къаравулда», «Искусство-дин устадар», «Чи хуьрер», «Пешекарди жаваб гузва», «Инсан ва девир», «Райондин сайтдин ва газетрин обзор», «Хуьруьн майишатдин карханайра», «Хуьрерин администрацийра», «Чи школайра», «Аялрин алемда», «Спортдин хабарар», «Эдебиятдин кимел» ва масабур.
Лагьана кIанда хьи, КТВ-дин пере-дачайриз къе неинки СтIал Сулейманан, гьакI Кьурагь, Дербент, Хив, Мегьарамдхуьруьн, Табасаран, гьатта Азербайжан Республикадин Къусар районрин гзаф агьалийривайни килигиз жезва.
Мад са кар къейд ийиз кIанзава. Телевиденида чпин пешейрин устадар тир инсанри кIвалахзава. Абурукай яз РФ-дин журналистрин Союздин член, корреспондент Агьмед Гьуьсейнован, вичи телевидение кардик акатай сифте йикъалай ина кIвалахзавай оператор Муса Мусаеван, программист Абдурагьман Фатагьован ва масабурун тIварар кьаз жеда.
КТВ-дихъ вичин умудлу даяхар-штатдик квачир корреспондентарни ава.