Малум тирвал, Дагъустан Республикада экстремизмдин ва терроризмдин гьерекатриз акси женгина общество тупламишунин, республикадин халкьарин садвал мягькемарунин мураддалди алай йисан I5-декабрдиз Махачкъала шегьерда Дагъустандин халкьдин Съезд кьиле тухуда. Адаз гьазурвилер акуниз талукь яз 18-ноябрдиз муниципальный райондин администрациядин заседанийрин залда райондин активдин совещание кьиле фена. Адан кIвалахда муниципальный райондин Кьилин везифаяр тамамарзавайди тир Ш. Гь. Мегьамедханова, Дагъустан Республикадин Халкьдин Собранидин депутат Гь. И. Мегьамедова, МО-дин администрациядин Кьилин везифаяр тамамарзавайди тир М. Гь. Агьмедова, райондин депутатрин Собранидин председателдин заместитель Н. Ш. Абдулмуталибова, администрациядин управленийрин, отделрин начальникри, карханайрин, организацийрин руководителри, хуьрерин поселенийрин кьилери, общественный тешкилатрин ва СМИ-дин такьатрин векилри иштиракна.
Совещание, сифте гаф рахуналди ва анал алай месэладикай лугьуналди, Ш. Гь. Мегьамедханова ачухна ва кьиле тухвана. Ада къейд авурвал, Дагъустандин халкьарин садвал мягькемарунин, абурун вилик акъвазнавай месэлаяр гьялуниз куьмек гунин мураддалди ва Дагъустан Республикадин Конституциядин 75-статьядал асаслу яз ДР-дин Президентди алай йисан 15-декабрдиз Махачкъалада Дагъустандин халкьарин Съезд тухунин гьакъиндай Указ акъуднава. Адаз гьазурвилер акунин мураддалди районда 17 касдикай ибарат тир тешкиллувилин комитет тешкилнава. Гьазурвилер акунин асул метлебдикай сад хуьрера, карханайра, общественный тешкилатра собранияр тухуникай, анрал районда тухудай конференциядиз ва Дагъустан Республикадин халкьарин Съезддиз делегатар хкягъуникай ибарат я.
Делегатар хкягъунин къайдайрикай, гьар хуьряй, тешкилатдай хкягъун лазим тир делегатрин кьадардикай совещанидал ДР-дин Халкьдин Собранидин депутат, академик Гь. И. Мегьамедова, райондин администрациядин профкомдин председатель Р. А. Абдулазизова информацияр авуна. Абуру къейд авурвал, хуьрерин агьалийри, общественный тешкилатри 1-декабрдиз тухудай райондин конференциядиз 120 кас ва Дагъустандин халкьарин Съезддиз 68 кас делегатар хкягъун лазим я. Абурни чеб чирвилер, ахлакь авай, халкь патал зегьмет чIугвазвай, хуьрерин социальный месэлаяр гьялиз, агьалийрин яшайишдинни дуланажагъдин шартIар хъсанариз алахъдай инсанар хьун лазим я.
Совещанидал алай месэладай анал чпин фикирар «Сад тир Россия» политический партиядин райондин отделенидин руководитель Б. Ширинова, Эминхуьруьн СОШ-дин директор Р. Османова, ЦРБ-дин кьилин духтурдин заместитель Р. Гъаниевади, райондин дяведин ва зегьметдин ветеранрин Советдин председатель М. Гьасанова, райондин электросетрин директор М. Ягьяева ва масабуру лагьана.
Ш. Гь. Мегьамедханова, Гь. И. Мегьамедова совещанидин иштиракчийрин патай хьайи суалриз жавабарни гана.