И йикъара Мегьарамдхуьруьн спорткомплексда 1994-1995-йисара дидедиз хьайи жаванрин арада азаддиз кьуршахар кьунай Советрин Союздин Игит Абас Исрафилов рикIел хкуниз бахшнавай республиканский турнир кьиле фена. Ана республикадин шегьеррайни районрай 15 командадик кваз атанвай 250-далай виниз спортсменри иштиракна. Абурун арада Вирироссиядин турниррин, Дагъустан Республикадин чемпионатрин гъалибчиярни призерар авай. Гьавиляй акъажунарни къизгъиндаказ кьиле фена. Чи райондин спортсменар тир Хазранов Ислама (30 кг.), Агъаханов Загьира (50 кг. кьведни Эминхуьр), Нуралиев Руслана (50 кг. Вини СтIал) и акъажунра приздин 3-чкаяр кьуна.
Эминхуьруьн ДЮСШ-дин директор, Къазахстан Республикадин лайихлу тренер Мегьамедкеримов Абдула чаз лагьайвал, Махачкъаладай, Хасавюртдай, Каспийскдай, Ахцегьай ва масанрай тир къуватлу спортсменри иштиракай турнирда 3-чкаяр кьун – им агалкьун яз гьисабиз жеда.
Турнирда 1, 2 ва 3-чкаяр кьур спортсменриз медалар, ДР-дин спортдин ва физкультурадин министерстводин ва «Мегьарамдхуьруьн район» муниципальный райондин администрациядин гьуьрметдин грамотаяр гана.