2006-йисуз М. М. Рагьимован тIварунихъ галай Курхуьруьн 1-нумрадин умуми образованидин юкьван школади вичин 50 йисан юбилей къейд авуна. Школадихъ акьалтзавай несилдиз чирвилер ва тербия гунин карда З. Г. Гьажалиева директорвиле кIвалахай йисара иллаки хъсан нетижаяр хьана. Адан руководстводик кваз школада 2000-далай виниз гадайриз ва рушариз чирвилер гана.
1954-йисалай 2000-йисалди школада директордин заместителвиле кIвалах авур Э. И. Пашаеван зегьмет ва чалишмишвилер себеб яз школада тербиядин кIвалах хъсан хьана.
Муаллимрин дурумлу зегьмет, абур кIвалахдив жавабдарвал гьисс авуналди эгечIун, кIвалахдин гзаф йисарин тежриба хьун – ибур халкьдин хъсан адетар, педагогикадин кIвенкIвечи тежрибаяр вилик тухунин асул чешмеяр хьана. Школа акьалтIарай, чпи жуьреба-жуьре чкайра, хилера кIва-лахзавай выпускникрихъ галаз гуьруьшмиш хьунар тешкилун ина фадлай адетдиз элкъвенвай кар я. Хейлин выпускникри, гьабурукай яз А. Рустамова, С. Рустамова, А. Абдуразакьова, С. Сагидова, З. Шайдаева, Р. Рагьимова школадиз спонсорвилин куьмекарни гузва.
«Перестройкадин» четин йисарани школади агалкьунар аваз кIвалахна, ам районда хъсан школайрикай сад яз амукьна. И йисара адан материально-технический базани мягькем хьана. Идак вичи 16 йисуз школадин директорвиле кIвалах авур Дагъустан Республикадин лайихлу муаллим Н. М. Гьажиеван зегьметдин еке пай ква.
Школада методический кIвалах иллаки виниз тир дережада аваз эцигнава. Алай вахтунда школада естественно-математический циклдин, сифтегьан классрин, гуманитарный циклдин муаллимрин ва классрин руководителрин методический объединенияр кардик ква. Школада методический кIвалахдиз Россиядин Федерациядин умуми образованидин отличник, образованидин Гьуьрметлу работник М. М. Шихрагьимова регьбервал гузва. Ам 1990-йисалай инихъ кIелунинни тербиядин рекьяй директордин заместителни я.
2002-йисан 18-апрелдиз школадиз Дагъустан Республикадин лайихлу муаллим М. М. Рагьимован тIвар гана.
Эхиримжи йисара гьукуматди акьалтзавай несил ахлакь-низам авайбур яз, ватанпересар яз чIехи авуниз артух фикир гузва. Алай аямдин истемишунрихъ галаз кьадайвал и рекьяй школада еке кIвалах тухузва. Кьилди къачуртIа, тербиядин рекьяй директордин заместитель Н. Э. Шафиевадин руководстводик кваз школьникриз патриотический, ахлакьдин тербия гунин, абуруз сагълам уьмуьр тухуз чирунин ва маса рекьерай школадилай къецяй хейлин мярекатар, «тербиядин сятер» тухузва.
Школада тербиядин рекьяй райондин школайрин директоррин заместителрин, гьакIни школайрин психологрин чирвилерин дережа хкаждай семинарар тухузва. ИкI, мисал яз, алатай кIелунин йисуз школада «Тарсара ва тарсарилай къецяй акьалтзавай несилдиз патриотический тербия гун», «КIелунинни тербиядин карда школьникар патал психология мягькемарунихъ авай метлеб» темайрай семинарар тухвана.
Школьникри Ватандин ЧIехи дяведин иштиракчийриз, пенсионерриз, инвалидриз, педагогикадин зегьметдин ветеранриз чпелай алакьдай куьмекар гузва, абур Ватандин ЧIехи дяведа телеф хьанвайбур рикIел хуьнин лишан яз эцигнавай обелискдихъ гелкъвезва.
Алай кIелунин йисуз школада 8 сифтегьан классар, урус чIаланни литературадин, лезги чIалан, математикадин, информатикадин, химиядин, биологиядин, физикадин, географиядин, историядин, къецепатан чIаларин, технологийрин, сифтегьан классрин кабинетар кардик ква.
Школада акьалтзавай несилдиз чирвилер ва тербия гунал 66 муаллим машгъул я. Абурукай 4-дахъ Дагъустан Республикадин лайихлу муаллим, 7-дахъ Россиядин Федерациядин умуми образованидин отличник лагьай гьуьрметлу тIварар ава. Муаллимар тир Г. А. Межидова, Т. М. Челябов ва Э. М. Шагьпазова Президентдин грантдин сагьибар я.
2006-йисуз акьалтзавай несилдиз чирвилер ва тербия гунин, материально-технический база мягькемарунин, школьникри райондин ва республикадин олимпиадайра агалкьунар къазанмишунин рекьерай хьанвай хъсан нетижайрай школа Президентдин грантдиз – са миллион манатдиз лайихлу хьана.
Акьалтзавай несилдиз чирвилер ва тербия гунин карда муаллимар тир урус чIалан ва литературадин – И. Г. Къазибеговадихъ, М. М. Шайдаевадихъ, Э. М. Шагьпазовадихъ, С. Н. Рамазановадихъ, лезги чIалан ва литературадин – Г. А. Межидовадихъ, М. Э. Абдуразакьовадихъ, математикадин – Л. Х. Гьажалиевадихъ, физикадин – Н. М. Гьажиевахъ, химиядин – М. М. Шихрагьимовахъ, Н. Э. Бутаевадихъ, биологиядин – Ш. Ш. Шихбабаевахъ, Н. Э. Шафиевадихъ, Б. З. Агъабековадихъ, У. Ф. Муталибовадихъ, информатикадин – Р. В. Тагъиевахъ, географиядин – Б. Н. Бутаевадихъ, къецепатан чIаларин – Ш. Н. Уружбековадихъ, З. Г. Сейбуллаевадихъ, тарихдин – Т. М. Челябовахъ, физкультурадин – М. А. Аскеровахъ, Р. Ш. Гьажалиевахъ, сифтегьан классрин – Л. Ш. Гьажалиевадихъ, С. Т. Къачаевадихъ, Л. Н. Шихрагьимовадихъ, Б. А. Шихрагьимовадихъ гьар йисуз хъсан нетижаяр жезва.
Эхиримжи вахтара школадин муаллимри ва аялри гьар жуьредин конкурсра активвилелди иштиракзава, анра приздин чкаяр кьазва. Ихьтинбурукай яз чавай А. Костюнинан яратмишунриз талукьарнавай «Купель» тIвар алай литературадин международный, гьакIни ЧIехи Гъалибвилин 65 йисан юбилейдиз талукьарнавай «Зи рикIел алама! За дамахзава!» ва «Зурба гьа йисариз за икрамзава» конкурсар къалуриз жеда.
Школьникри гьар йисуз школада, районда ва республикада тухузвай олимпиадайра кIвенкIвечи чкаяр кьазва, идалди муаллимри гьакъисагъвилелди кIвалахзавайди къалурзава.
Школада спортдин са шумуд секцияни кардик ква. Анра вердишвилер къачузвай аялри районда ва республикада тухузвай чемпионатра, акъажунра иштиракзава, приздин чкаяр кьазва.
Школади вичин выпускникрални дамахзава.
Медалар аваз школа акьалтIарзавай аялрин кьадар йисалай-суз артух жезва. Са шумуд касди алай вахтунда Москвадин, Санкт-Петербургдин ва маса шегьеррин вузра кIелзава.
Школа акьалтIарай гзафбуру алимар, чIехи дережайрин руководителар, пешекарар яз кIвалахзава. Абурукай яз чавай биологиядин илимрин доктор А. А. Алдерован, зооветеринарный илимрин доктор А. М. Гьажиеван, медицинадин илимрин доктор Р. М. Рагьимован, математикадин илимрин кандидатар тир Р. К. Рагьимханован, И. М. Челябован, философиядин илимрин кандидатар тир М. Ч. Сагидовадин, А. Г. Къачабекован, ветеринарный илимрин кандидат З. Н. Бутаеван, хуьруьн майишатдин илимрин кандидат В. К. Сердерован, физико-математический илимрин кандидат К. С. Къазиеван, медицинадин илимрин кандидат Д. М. Рагьимовадин ва масабурун тIварар кьаз жеда.
Школадин педколлективди алай кIелунин йисни хъсан нетижаяр аваз акьалтIарун патал зегьмет чIугвазва.