Чи уьмуьрда важиблу кеспияр гзаф ава: алимвал, муаллимвал, духтурвал, агрономвал, инженервал, малдарвал... Амма гьакъикъатда вири терефар ахтармишна. абурукай виридалайни важиблуди гьим я лагьайтIа, за, са кIусни шаклу тахьана лугьуда: духтурвал. Эхь, гьакъикъатдани и лацу халатар алай чпи Гиппократан кьин ганвай, юкъузни-йифиз рикIин секинвал авачир ва герек чIавуз эверайла йифизни месикай къарагъна начагъдан гьарайдиз физвай инсанрал виридалайни чIехи ихтибар авунва: абурун гъиле чилин винел виридалайни багьа хазина тир инсандин уьмуьр адан кьисмет ава.
Сулейман-Стальский ЦРБ-дин духтур-хирург ва педиатр Гьажимирзоев Ражидина 1990-йисан октябрдилай ина кIвалах ийиз хьайи вахтунда устадвилелди авур са шумуд четин операциядин гьакъиндай, гзафбуруз хьиз, зазни ван хьанай. Кьилди къачуртIа, са шумуд йисан вилик гуьлле алай яракьдай яна залан хер хьайи милициядин работник курхуьруьнви Мирзоев Алимурад кIвачел ахкьалтарун къени чи са бязи хирургри аламатдин кар, райондин хирургиядин кIвалахда еке агалкьун яз гьисабзава.
- Жуван вилик акваз-акваз чан гузвай инсан ажалдии къармахрай акъудун патал вири фикир и кардиз гузвайла, адаз хьанвай хасаратвилин кьезилвал ва заланвал аквадач, - лугьузва Ражидин духтурди. - И чIавуз гьар са декьикьадал еке роль къугъвазва. Жуван гъиле инсандин кьисмет авайди фикирдай акъудна виже къведач.
Эхь, гьакъикъатдани Ражидин духтур вичи хкягъай пешедай уьмуьрдин макьсад, руьгьдин таъминвал жагъанвай инсанрикай сад я.
Вуж я ам райондиз хтана са акьван вахт жедалди вичин тIвар вирибуруз сейли авурди?
1956-йисуз Сайтархуьре Гьажимирзоев Гьажимирзедин хзанда дидедиз хьайи ам Гьетягърин юкьван школа акьалтIарайдалай гуьгъуьниз Дагъустандин медицинадин институтдиз гьахьна.
ВУЗ куьтягьай 1980-йисуз Ражидин кIвалахиз виликан Таджикистан ССР-дин Орджоникидзеабад шегьердиз рекье туна. Ина жегьил пешекарди медучилищеда тарсар гуз хьана. Гуьгъуьнлай Ражидин духтурди Нуьрек шегьерда больницада хирург-ординатор яз, ахпа хирургический отделенидин заведующий яз кIвалахна. Вири и йисара, вич жегьил пешекар яз, ада са шумуд четин операциярни авуна. Гьа са вахтунда хирургвилин устадвал хкажунал, кIвенкIвечи хирургрин тежриба чирунал ара датIана кIвалахна ва исятдани кIвалахзава.
1987-йисуз адаз хирургвилин 2-квалификациядин категория гана.
1988-йисуз ам Таджикистандин Госмединститутдин ординатурадиз гьахьна ва ам лап хъсан къиметар къачуналди акьалтIарна. Вичи кIвалах авур гьар са чкада вичин пешедал рикI хьуналди ва кардин гъавурда хьуналди, начагъбурухъ галаз дуьз рафтарвал авуналди Р. Гьажимирзоева таджик халкьдин патай еке гьуьрмет ва авторитет къазанмишна.
Амма рикIе жуван хайи халкьдиз къуллугъ авунин мурад авай Ражидин духтур вичин ватандиз хтана.
Вичихъ галаз авур суьгьбетда Ражидин духтурди къейд авурвал, а ч1аван ДАССР-дин здравоохраненидин Министерствода адаз МВД-дин санчастуна кIвалах авун ва маса чкаярни теклифнайтIани ам хайи райондиз хтана.
- Махачкъалада захъ кIвалахдин, гьамни илимдин рекьяй виниз тир дережаяр къазанмишдай, фадлай рикIевай мурадар кьилиз акъуддай мумкинвал жезвайтIани, - лугьузва Р. Гьажимирзоева, - зун Кьасумхуьрел хтунал са кIусни пашман хьанач. Гьар са кас сифте нубатда жуван хайи халкьдин къуллугъда акъвазна кIанда. Жуван къуватар, чирвилер масанра серф авуна, са куьнизни бакара амачирла хайи чилихъ Ватандихъ ялунни са кьегьалвал туш.
РикI ва гъил михьи ада, духтур ва хуш къилихрин инсан яз, районэгьлийрин, гьакI маса районрин агьалийрин патайни лайихлу гьуьрмет къазанмишнава. Хирург яз Р. Гьажимирзоева, гъвечIи операцияр квачиз, гьар йисуз 80-100 операция ийизва, гьа са вахтунда ада аялрин духтурвални ийизва. Адан кIвалахдилай ЦРБ-дин руководстводи, хирургический отделениедин заведующий кьилин категориядин хирург Седредин Сулейманова, гьакI амай адахъ галаз санал кIвалахзавай юлдашри, начагъбуруни еке разивал ийизва.
Дамах гвачир, вичин пешекарвилин устадвал ара датIана хкажунал машгъул тир Ражидин Гьажимирзоевича шак алай кар вичелай гзаф тежриба авай духтуррал меслят гъида, герек чIавуз гафуналди ва кардалди вични абурун куьмекдиз фида. Ам инин медперсоналдиз неинки вичин инсанвилин, агъайнавилин лишанралди, гьакI герек чкадал вичин принцип хуьналдини хуш я. Адан сивяй векъи гафунин ван я кIвале, я кIвалахал къведач.
Гьар йикъан кIвалах башламишдалди вилик пакамахъай, я тахьайтIа мумкинвал хьайи маса вахтунда ада вичин гуьзчивилик квай начагъдал кьил чIугун тавуна тадач, адав хуш рафтарвал аваз рахада, куь секинсузвал гузватIа хабар кьада, меслятар къалурда.
Юкьван буйдин, къумрал якIарин, хуш къилихрин инсан тир ам акур начагъдан гуьгьуьл гьасятда ачух жеда. Эхь, халис духтур хьун патал адаз и жигьетдай тIебиатдин патайни пай ганва. Ражидин гьакъикъатдани лацу халат алаз ханвайбурукай сад я. Ада неинки планламишнавай, гьакI экстренный хирургиядай, травмотологиядай, урологиядай, онкологиядай ва гинекологиядайни операцияр кьиле тухузва. Ам ЦРБ-диз хтунихъ галаз алакъалу яз инсандин хурун ва руфунин органриз къенепата хасаратвал хьайила герек операцияр чкадал кьиле тухунни артух хьана,
Ражидин Гьажимирзоевичан уьмуьрдин юлдаш Жамиляни чи райондилай къеце патани гзафбуруз машгьур хуш къилихрин дишегьли, савадлу пешекар-духтур я. Алай вахтунда ада чи районда авай ВТЭК-дин кIвалахдиз регьбервал гузва.
Абуру чпин веледрикайни хайи халкьдиз ва Ватандиз вафалу инсанар хкудун патал кIевелай чалишмишвал ийизва.
Духтуррин международный Югъ тебрик авунихъ галаз санал чаз Ражидин Гьажимирзоевичахъ, райондин агьалийрин сагъламвилин къаравулда уях яз акъвазнавай ЦРБ-дин вири духтуррихъ, гьакIни ветеранрихъ чандин мягькем сагъвал, хзанра бахт, берекат ва дуьньядани ислягьвал хьана кIанзава.