Чи район тешкилунихъ галаз сад хьиз, уьлкведин законар, адан агьалийрин законлу интересар ва ихтиярар хуьн таъминарун патал суддинни прокуратурадин ва милициядин кIвалах къайдадик кутунин важиблувал фикирдиз къачуналди, 1937-йисуз чи райондани райондин суд тешкилна. Адан административный дарамат алай вахтунда Кьасумхуьруьн центрдал алай Мусаиб Стальскийдин тIварунихъ галай переулокдин 7-нумрада ава.
Вичин тарихда райондин суддиз гьар йисара бажарагълу, къанажагълу ва савадлу пешекарри регьбервал гуз хьана. ИкI, Ватандин ЧIехи дяведин йисара (1942-1943-йисар) райондин судьядин везифаяр вахтуналди Селимханова Важибата кьиле тухвана.
Дяведилай гуьгъуьнин 1945-1948-йисара райондин суддин судьявиле Ватандин ЧIехи дяведин иштиракчи Шихкеримов Салигь Шихкеримовича кIвалахна. 1951-1965-йисара суддин председателвал Ватандин ЧIехи дяведин иштиракчи Тагьиров Мегьамед Азимовича авуна, 1965-1967-йисара судьявилин везифаяр Н. С. Мегьтиева кьиле тухвана.
1967-йисалай 1982-йисалди, яргъал вахтунда, райондин суддин председателвилин жавабдар къуллугъ Бутаев Ниязбег Ферзилаевича кьиле тухвана.
Чилер зурзайдалай гуьгъуьниз чкIидай гьалда авай суддин дараматдин эвезда райондин халкьдин суддин цIийи дарамат эцигунин къарар кьабулна. 1974-йисуз Сулейман-Стальский райондин халкьдин суддин са мертебадин дарамат ишлемишиз вахкана. Ам са составдин суд патал эцигнавайди тир.
1982-1987-йисара райондин суддин председателвилин къуллугъ Алиева Тамамат Алиевнади кьиле тухвана. 1987-йисан 7-майдилай 1993-йисан 9-ноябрдалди суддин председателвал Гьасанов Алаудин Гьасановича авуна. 1993-1994-йисара суддин председателвилин везифаяр вахтуналди Жабраилова Аида Жабаровнади кьиле тухвана.
1994-йисан сифте кьиляй райондин суд кьве составдинди хьана ва идахъ галаз алакъалу яз гьа и йисан мартдин вацралай суддин председателвиле Магьмудов Агъабала Магьмудович тайинарна ва и къуллугъ ада 2004-йисалди кьиле тухвана.
1999-йисалай ДР-дин Юстициядин Министерстводи суддин дарамат ДР-дин Суддин департаментдин Управленидин балансдал хкана.
Райондин агьалийрин кьадар ва гьакIни суддинни адан аппаратдин кIвалах артух хьунихъ галаз алакъалу яз райондин суд 3 составдинди хьана.
Судьяйрин штатрин ва суддин аппаратдин работникрин кьадар артух хьунихъ галаз алакъалу яз 2003-йисуз суддин дараматдихъ алава цIийи чкаяр гилиг хъувуна.
2004-йисалай къенин йикъалди райондин суддин председателвилин жавабдар къуллугъ Айбатов Мегьамедзаид Мегьамедмирзоевича кьиле тухузва.
Райондин суд вич тешкилайдалай инихъ ана лайихлу тIварарин ва гьукуматдин наградайрин сагьибар тир судьяйри кIвалахна.
Отставкада авай судья Магьмудов Агъабала Магьмудович Дагъустан Республикадин лайихлу юрист, судья Жабраилова Аида Жабаровна юридический илимрин кандидат тир.
Гьар са суддин кIвалах суддин вири коллективдин ва адан аппаратдин чалишмишвилерин нетижа я. Суддин сад тир кIвалахдин дережа суддин гьар йикъан кIвалахда иштиракзавай гьар са судьяди ва суддин аппаратдин работникди кутазвай вичин зегьметдин паюнилай гзаф аслу я.
Алай вахтунда Сулейман-Стальский райондин судда 12 касди кIвалахзава. Абурукайни сад-суддин председатель, кьвед – судьяяр, 8 кас федеральный государственный къуллугъчияр: суддин председателдин куьмекчи, кьведни судьяйрин куьмекчияр, суддин заседанийрин 3 секретарь, информациядин рекьяй пешекар ва суддин администратор я. 4 кас суддин дарамат хуьнал ва адаз къуллугъ авунал машгъул я.
Райондин суддин бине чпихъ къайдаяр хуьдай органра кIвалах-дин гзаф йисарин тежриба авай вини дережадин чирвилер авай пешекаррикай ибарат я.
Судда гзаф яшар хьанвайбур жегьил пешекарралди эвез авунин кIвалахни кьиле физва. ИкI, 2007-йисуз ДР-дин Сулейман-Стальский райондин 124-судебный участкадин мировой судьядин къуллугъдал вичи виликдай райондин суддин судьядин куьмекчи яз кIвалах авур Магьмудов Тимур Агъабалаевич тайинарна. Алай йисан августдин вацра вичи 40 йисалай виниз райондин судда кIвалах авур суддин секретарь Наврузалиева Маисат Насировна лайихлу ял ягъун патал гьуьрметдивди рекье туна.
Тежрибалу работникрихъ галаз сад хьиз, райондин судда чпихъ чарасуз тир чирвилер ва талукь квалификация авай жегьил пешекаррини кIвалахзава. 2008-йисуз вичи виликдай ДР-дин Сулейман-Стальский райондин 79-нумрадин суддин участкадин мировой суддин секретарвиле кIвалах авур Шихбабаев Маидин Рабидинович райондин суддин цIийи помощниквиле кIвалахал кьабулна.
2009-йисан майдиз чи суддиз информациядин рекьяй штат гана ва гьа и йисан июндиз информатизациядин рекьяй пешекарвилин къуллугъдал Нуралиев Расул Мегьамедэминович тайинарна.
Къенин юкъуз судда «Правосудие» ГАС подсистемадикай гегьеншдаказ менфят къачузва. 2008-йисан 22-декабрдиз ФЗ 262-нумрадик кваз кьабулнавай «Об обеспечении доступа к информации судов в Российской Федерации» Федеральный закондин положенияр уьмуьрдиз кечирмишунин мураддалди Интернет-сайт суддин кIвалахдин гьакъиндай гьар гьафтеда талукь тир информациядалди алава ийизва.