Жуван рикI алай кеспидин сагьиб хьунилай белки инсандиз маса еке бахт авач жеди. Ихьтин бахтлу ксарин жергедай яз Кьасумхуьруьн 2-нумрадин юкьван школадин чIаланни литературадин тарсар гузвай кьилин категориядин муаллим Нежведилова Пирис Эмировнадин тIварни кьаз жеда.
Гзаф йисара Чуьхверхуьрел, Ивиграл ва Алидхуьрел муаллим яз кIвалах авур чIехи хзандин сагьиб тир вичин буба Эмир Шабановичан рехъ давамарунин мураддалди школа куьтягьайла Пирис Эмировна ДГУ-дин филологический факультетдик кIелиз экечIна ва 1984-йисуз анаг агалкьунралди акьалтIарна. Хайи хуьруьз хтай и йисалай эгечIна къенин юкъузни ада Кьасумхуьруьн 2-нумрадин юкьван школада чIаланни литературадин муаллим яз кIвалахзава. Вичи хкягъай пешедай руьгьдин таъминвал, уьмуьрдин макьсад жагъанвай Пирис Эмировнади вичин кIвалахда, тарсара методикадин цIийи къайдайрикай, кIвенкIвечи муаллимрин тежрибадикай, лезги ва урус чIаларикай, методический пособийрикай гегьеншдаказ менфят къачузва, аялрин активвал хкажуниз кьетIен фикир гузва.
Гьавиляй ада тарсар гузвай аялрихъ чIалан ва литературадин предметрай школада, районда кьиле физвай олимпиадайрани хъсан нетижаяр жезва. Абуру гьакI школада кьиле тухузвай вечерра, викторинайрани активвилелди иштиракзава.
Алай вахтунда П. Нежведиловади 10 «б» классдиз регьбервал гузва. Классда авай 16 аялди хъсандиз кIелзавайди хьиз, чеб ахлакьдин жигьетдайни амайбуруз чешне жедайвал тухузва, абур классда михьивал ва къайда хуьз алахъзава.
Школадин руководстводини гзаф йисарин дурумлу зегьметдалди, вичин пешедал рикI хьуналди педколлективда лайихлу гьуьрмет къазанмишнавай Пирис Эмировнадин кIвалахдилай еке разивал ийизва. Ам са шумуд сеферда руьгьдин жигьетдай ашкъиламишнава, чухсагъулар малумарнава. Амма вичи тарс гайи аялрин – алай вахтунда гьар пешейрин сагьибрин – патай вичиз авай гьуьрмет ада виридалай еке награда яз кьабулзава.
Пирис Эмировна хъсан муаллим ва тербиячи хьиз, адалатлу хзандин сагьибни я. Вичин уьмуьрдин юлдаш Нежведилов Эйзудинахъ галаз санал абуру 3 велед хвена, абурукай Ватандиз ва хайи халкьдиз вафалу инсанар хкатун патал алахънава.
ИкI, абурун чIехи руша Маринади Махачкъаладин медакадемиядин 5-курсуна кIелзава. Хва Имам ЮФУ-дин юридический факультетдин студент я. Икрама 10-классда кIелзава.
Акьалтзавай несилдиз дерин чирвилер ва тербия гун, абурукай хайи халкь патал вафалу инсанар хкудун патал галатун тийижиз кIвалахзавай муаллим Пирис Эмировнадиз пешекарвилин сувар – муаллимрин Югъ ва вичин уьмуьрдин 50-гатфар къейд авун мубарак авунихъ галаз сад хьиз, чаз адахъ хзанда бахт, берекат ва вичин хивевай жавабдар кIвалахда мадни еке агалкьунар хьана кIанзава.