И мукьвара Махачкъалада лезги писателрин Союздин заседание хьана ва анал и Союз тешкилай йикъалай инихъ (1990-йис) 20 йисан къене адаз регьбервал гайи машгьур писатель ва алим Къурбан Акимова, и девирда ЛПС-ди тухвай кIвалахдикай гьахъ-гьисаб авурдалай гуьгъуьниз, гуьгьуьллувилелди и къуллугъ шаир Дагъустандин халкьдин шаир Хуьруьг ТIагьиран хва Максим Алимовал ихтибарна.
Абур кьведни и йикъара Сулейман-Стальский райондиз мугьмандиз хтана, ина кардик квай лезги писателрин Союздин райондин отделенидин членрихъ, абурун кIвалахдихъ галаз таниш хьана.
ЛПС-дин райондин отделенидин председатель Абидин Камилова анал вичин гьахъ-гьисаб авуна. Къазанмишнавай агалкьунрикай ва кIвалахда амай кимивилерикай лагьана.
Анал чпин фикирар ва теклифар гваз рахай шаирар тир С. Саидгьасанова, и цIарарин авторди, писатель Н. Шихнабиева, Р. Набиева, В. Жамалдинова, А. Агьмедпашаева докладчидин кIвалахдиз рази жедай къимет гана. Абуру «Куьредин ярар» культурадин центрди (регьбер А. Агьмедпашаев) чкадал чи шаиррин ктабар акъудунин кIвалах гуьнгуьник кутуна, са артух харжияр авачиз ктабар акъудиз жезвайди ва а кардал разивал, дамах ийизвайди чуьнуьхнач. Гьа са вахтунда кIвалахда амай кимивилерикай, четинвилерикайни лагьана.
Къ. Акимова вичи М. Алимоваз вичелай алакьдай вири жуьредин куьмекар гудайди, лезги чIал, культура вилик тухун патал инлай кьулухъни къерех тежедайди ашкара авуна.
М. Алимова чпин гележегдин планрикай гегьеншдиз рахунар авуна, кьилди къачуртIа, лагьана ада, лезги писателрин Союздин фикирдик дипломар, Гьуьрметдин грамотаяр, хурудал алкIурдай значокар акъудун ква. Адалайни гъейри Союздин фонд тешкилда. Лишанлу йикъар хьайила шаирар ва писателар руьгьламишун патал абур саймишда.
Ахпа абур яшлу шаирар тир Абдурагьман Межидоваз, Мислимат Агьмедпашаевадиз ва писатель, драматург Абдулбари Магьмудоваз мугьман хьана.