1-октябрдиз чи баркаллу районэгьли, вич лайихлу пенсиядиз экъечIдалди гзаф йисара республикадин «Лезги газетда» фотокорреспондент яз кIвалах авур РФ-дин журналистрин Союздин член, Дагъустандин культурадин лайихлу работник, чи газетдин амадаг винистIалви Мегьамедов Тажидин Мирземегьамедовичан 70 йисан юбилейдиз талукьарнавай шадвилин мярекат кьиле фена.
Ана иштирак ийиз адан багърийрилай гъейри райондин векилар, «Лезги газетдин» кьилин редактор Саидов Агъариза Узаирович кьиле аваз са десте работникар ва ярар-дустар атанвай. Ихьтин гьуьрмет ада вичин гзаф йисарин намуслу зегьметдалди, инсанвилин хуш къилихралди, вижданлувилелди къазанмишнавайди я.
И межлис кьиле тухунин гьуьрметлу ихтибар вичин хиве тур «Лезги газетдин» литературадин отделдин редактор, машгьур шаир Мердали Жалилова Тажидин Мегьамедован журналиствилин кIвалахдал къведалди фейи уьмуьрдин рекьикай куьрелди суьгьбет ийидайла къейд авурвал, Каспийскдин школа-интернат акьал-тIарайдалай гуьгъуьниз ада и шегьерда авай «Дагдизель» заводда кIвалахна.
Чирвилер къачунихъ ва кIелунихъ къаних тир ам ДГУ-дин къецепатан чIаларин факультетдик экечIна. Хъсан пешекар ва общественник тир ам ДГУ-дин ректор АбутIалиб Абилович Абилова и университетда кIвалахал туна. Ина ада 6 йисуз ДГУ-дин проректордин заместителвилин жавабдар везифаяр кьиле тухвана, амни студентрин яшайишдин месэлайрихъ галаз алакъалу тир.
Гуьгъуьнлай, са шумуд къуллугъар дегишарайдалай гуьгъуьниз, кьисметди Тажидин стха «Лезги газетдиз» гъана. Им адан вичин бахт хьиз, чи коллективдин бахтни хьана. Уьмуьрдин еке тежриба ва хъсан кьатIунар авай ада фотокорреспондент яз куьруь са вахтунда вичикай хабар гана ва республикада машгьурвал къазанмишна. Каспийскда, Махачкъалада, хайи районда ачухай адан фотовыставкаяр тамашачийри еке хушвилелди кьабулна.
Алай вахтунда лайихлу пенсияла аватIани, ам райондин общественный уьмуьрдивай къерех хьана акъвазнавач. Къуй вичиз сагъ чан, яргъал уьмуьр гурай, хъсан фотокорреспондент ва писателни яз яратмишунрин рекье мадни еке агалкьунар хьурай, - лагьана ада эхирдай.
Тебрикдин хуш келимаяр гваз сифте анал Тажидин Мирземегьамедовичан чIехи стха Магьамдали Мегьамедов рахана.
Гуьгъуьнлай анал гаф гана рахай «Лезги газетдин» кьилин редактор РФ-дин культурадин лайихлу работник Агъариза Узаировича редакциядин коллективди санал гьазурнавай юбилярдин тIварцIиз хуш келимаяр лагьанвай тебрикдин чар кIелна.
Гуьгъуьнлай анал чпин ва гьакIни чпи кIвалахзавай коллективрин тIварцIихъай тебрикдин хуш келимаяр, пишкешар гваз «Лезги газетдин» политикадин отделдин редактор Нариман Ибрагьимов, адан хсуси корреспондент Шагьабудин Шабатов, чи райондин культурадинни информациядин управленидин начальник Майрудин Бабаханов, КТВ-дин руководитель Ярагьмед Ярагьмедов, шаир Сажидин, Дагъустандин халкьдин артист Тарлан Мамедов, художник Агьмад Адилов, «Ашагастальский» ЗАО-дин директор Ибрамхалил Ибрамхалилов, и цIарарин автор ва са жерге маса юлдашар рахана.
И мярекат райондин культурадин уьмуьрда лишанлу вакъиадиз элкъвена.