5-октябрдиз «Касумкент» тIвар алай межлисар кьиле тухудай чIехи залда муаллимрин йикъаз талукьарнавай шад мярекат кьиле фена. Ам «Сулейман-Стальский район» муниципальный райондин администрациядин Кьилин везифаяр тамамарзавайди тир Мусаиб Агьмедова тебрикдин чар кIелунилай башламиш хьана. Администрациядин махсус къарардин бинедаллаз райондин конкурсда гъалиб хьайи муаллимрив ада райондин виридалайни чIехи награда тир Гьуьрметдин грамотаяр ва гьар садав 10 агъзур манатдин кьадарда аваз пулдин пишкешар шад гьалара вахкана.
Райондин администрациядин Кьилин заместитель Савин Велиева Кьасумхуьруьн сад нумрадин юкьван школадин 6 муаллимдив гьар садав 5 агъзур манат пул ва школадизни 10 компьютер вахкана. Абур ДР-дин зегьметдин ва социальный жигьетдай вилик финин министр Исмаил Эфендиева сад лагьай сентябрдиз вичи кIелай школадин коллективдиз хиве кьурбур тир.
Гуьгъуьнлай анал рахай РУО-дин начальник Жабраил Асланова, райондин образованидин работникрин профкомдин председатель Халилбег Халилбекова, ЦIийи поселокдин юкьван школадин муаллим Зоя Мегьамедовади, Курхуьруьн кьвед лагьай нумрадин юкьван школадин директор Небиуллагь Алхасова, ДР-дин Халкьдин Собранидин депутат Гьамидуллагь Мегьамедова алай вахтунда муаллимди чIугвазвай зегьмет чIехиди тирди, адан тIвар чIехи гьарфунилай кхьин лазим тирди, мажибар гъвечIибур, яшайишдин шартIар акьван хъсанбур туштIани, муаллимар чпин пешедиз вафалу яз, акьалтзавай несилдиз дерин чирвилер, тербия гунал машгъул жезвайди лагьана. Вучиз лагьайтIа, абур къе тахьайтIа, пака белки хъсан жен лугьуз умудлу я.
Райондин культурадин Дворецдин художественный самодеятельностдин коллективдин солистар тир Тофик Мегьамедова ва Эминуллагь Кьадиева, Вини СтIалрин юкьван школадин муаллим Селминат Алискеровади, райондин аялрин яратмишдай КIвалин директор Мурвет Мелахимова, ДРСУ-дин мастер Рагьман Мурадова, саки райондин вири школайрин художественный коллективри, Курхуьруьн кьвед лагьай нумрадин юкьван школадин муаллим Райсудин Набиева тамамарай манияр гурлу капар ягъуналди къаршиламишна.
И мярекат райондин администрацияди, РУО-ди, райондин образованидин профкомди саналди тешкилнавайди тир.
Райондин муаллимар патал и югъ лап яргъалди рикIел аламукьдайди хьана. Майрудин Бабаханова лагьайвал, Аллагьди аялар арадал гъизва, муаллимди – инсанар.
Сагъ хьурай муаллимар, чи аялрикай халисан инсанар хкудзавай!