И йикъара Махачкъалада СССР-дин Кубокдин 3-призер, СССР-дин кIвен-кIвечивал патал акъажунрин 2-призер Гьамзат Расулован гьуьрметдай чIехибурун арада дзюдодай Дагъустан Республикадин чемпионат кьиле фена. Ана 250-дав агакьна республикадин шегьеррай ва районрай атанвай спортсменри иштиракна. Абурун арада Кьасумхуьруьн дзюдодин ва самбодин ДЮСШ-да вердишвилер къачузвай Керимов Муслим, Гьасанбутаев Шейхулагь, Аскеров Руслан ва Мамеев Эмирни авай.
Чи командадин тренер, дзюдодай пешекаррин арада дуьньядин чемпион Тельман Къурбанова чаз лагьайвал, чемпионатда неинки республикадин, гьакI федеральный округдин, Россиядин чемпионатдин ва международный турниррин чемпионатрин призерри иштиракна, гьавиляй спортсменрин арада акъажунарни къизгъиндаказ кьиле фена.
17 йис хьанвай М. Керимова и чемпионатда иллаки хъсан нетижа къалурна. 66 килограммдин заланвиляй ада 5 спортсмендин винел гъалибвал къачуна, приздин 3-чка кьуна. Адаз буьруьнждин медаль, спортдин ва физкультурадин министерстводин 3-дережадин Диплом гана.
Лагьана кIанда хьи, Муслим самбодай ва дзюдодай жаванрин арада Дагъустан Республикадин чемпион, РФ-дин спортдин мастервиле кандидат я.
Гила Керимов Муслима, Мамеев Эмира ва Гьасанбутаев Шейхулагьа ноябрдин вацра Нальчик шегьерда дзюдодай кьиле фидай Кеферпатан Кавказдин Федеральный округдин чемпионатда иштиракда.