Вич жегьил итим ятIани, Эминхуьряй тир карчи Асаханов Тагьир Максимовича хуьр-кIвал, жемят патал хийирлу, мергьеметлу кIвалахар ийиз са шумуд йис я. Вич хъсан спортсмен тир ада жегьилар спортдал желб авуниз, жуьреба-жуьре турнирар тухуниз иллаки кьилин фикир гузва. Са тIимил вахт идалай вилик Т. Асаханова вичин пулунин такьатралди Эминхуьре са шумуд командадин иштираквал аваз азаддаказ къуршахар кьунай ва футболдай турнирар тухванай.
Тагьир Максимовича и йикъара мад Эминхуьруьн са шумуд командадин иштираквал аваз футболдай чIехи турнир тухвана. Финалда хуьруьн командади, 6:2 гьисабдалди ДЮСШ-дин и хуьре кардик квай филиалдин командадин винел гъалибвал къачуналди, турнирда 1-чка кьуна. РикI михьи, гъил ачух кас тир Т. Асаханова 1-чка кьур хуьруьн командадиз 5000, 2-чка кьур ДЮСШ-дин филиалдин командадиз 3000 ва 3-чка кьур хуьруьн юкьван школадин командадиз 2000 манат пул, хъсан къугъвай футболистризни къиметлу пишкешар гана.
Ихьтин мергьеметлу кIвалахрай хуьруьнвийри кьегьал хва Тагьир Асахановаз аферин ва баркалла лугьузва.