Кеферпатан Кавказ вилик фида ва и кардиз террористрин гьерекатривай манийвал гуз жедач, малумарна 6-сентябрдиз Россиядин Гьукуматдин Председатель Владимир Путина. Премьер-министрди совещание кьиле тухвана. Анал Кеферпатан Кавказдин федеральный округ социальный, экономикадин жигьетдай вилик тухунин стратегиядиз килигна.
«Гайи теклифарни фикирда кьуналди, Кеферпатан Кавказдин федеральный округ 2025-йисалди вилик тухунин стратегия гьазурна. Къе чна а стратегия тестикьарда ва ам уьмуьрдиз кечирмишун патал государстводин махсус программа гьазурда. А программади тайин мурадрихъ элкъуьрнавай федеральный программаяр, кьилдин ксарин бизнесди ва госкомпанийри уьмуьрдиз кечирмишзавай проектар сад-садав агудда», - малумарна Премьер-министрди.
Совещанидин кIвалахда РФ-дин финансрин министр Алексей Кудрина, Внешэкономбанкдин председатель Владимир Дмитриева ва РФ-дин Сбербанкдин кьил Герман Грефани иштиракна.
Премьердин гафаралди, СКФО вилик тухунин цIийи программади кIвалахдин 400 агъзурдалай тIимил тушиз цIийи чкаяр тешкилдай мумкинвал гуда. Идалайни гъейри, Гьукуматди «эцигунар, кудай шейэринни энергетикадин комплекс, хуьруьн майишат, туризм, санаторийрани курортра къуллугъар авун, инфраструктура, энергетика, транспорт хьтин хилер активдаказ вилик тухун» планламишзава. «Социальный хиле здравоохраненидиз, образованидиз, библиотекайрин кIвалахдиз, культурадиз, гьа виликдай хьиз, кьилин фикир гуда. Чна гражданрин ва жегьил ксарин инициативайриз рехъ ачухда, миллетрин ва динрин арада авай алакъаяр мягькемарда», -къейдна Путина.
Гьа са вахтунда Премьер-министрди алава хъувурвал, региондин гележег Кеферпатан Кавказда тешкилун фикирдиз къачунвай вилик финин такьатрин мумкинвилерилай гзаф дережада аслу жеда.
Идахъ галаз алакъалу яз Путина инвестицийрин фонд ругуд миллиард манатдин артухарун къарардиз къачунвайди къейдна: «И такьатар Кеферпатан Кавказда проектар уьмуьрдиз кечирмишун патал серфда».
Премьерди мадни малумарайвал, террористрин гьерекатривай Кеферпатан Кавказ вилик финиз манийвал гуз жедач, хабар гузва «Новости» РИА-ди. «Квез чизвайвал, арадал атанвай гьалар асантбур туш. Идан патахъай эхиримжи вакъиайри, кьиле тухвай терактрини шагьидвалзава. Амма Кеферпатан Кавказ, экономика, социальный хел вилик тухунин планар гьа иниз килигна мадни важиблубуруз элкъвезва», - лагьана В.Путина.
Кьилдин ксарин инвестициярни гьисаба кьурла, Кеферпатан Кавказ вилик тухунин барадай гьеле хъсанбур яз гьисабнавай проектар финансламишун патал, санлай къачурла, 600 миллиард манатдин такьатар чара ийида, малумарна вице-премьер, СКФО-да РФ-дин Президентдин патай тамам ихтиярар ганвай Векил Александр Хлопонина. Совещанидал ада мадни къейд авурвал, Кеферпатан Кавказда туриствилин кластердин инфраструктура тешкилун патал федеральный бюджетдай ийидай харжийрин кьадар 60 миллиард манатдив агакьун мумкин я.