Инсанар ва кьисметар – жуьреба-жуьре я абур. Инсанар ава девлетринни хазинайрин гуьгъуьна авай. Садбуруз рикI алай кIвалахди, хзанди руьгьдин таъминвал, рикIин шадвал гуда. Гьа ихьтинбурук Кьасумхуьрелай тир вичи яргъал йисара райондин судда секретарвиле кIвалахзавай Наврузалиева Маисат Насировна акатзава. Милайимвал, къени къилих, инсанвилин хесетар ада хейлин йисара райподин управляющийвиле кIвалах авур вичин дах Насиравай ва Кьурагьрин госбанкда бухгалтервиле кIвалах авур диде Маизатавай къачуна.
Камаллу диде-бубадихъ усал хва жедач, лугьузва бубайрин камаллу мисалда. Чаз ихьтин диде-бубадихъ усал рушни жедач лугьуз кIанзава.
- За Маисат Насировнадихъ галаз кIвалахиз 10 йисалай виниз я, - лугьузва райондин федеральный суддин председатель Мегьамедзайид Мегьамедмирзоевич Айбатова. – И йисара заз агьалийрин патай адан кIвалахдилай наразивал авур гьич са дуьшуьшни хьанач. Мадни, Маисат вахакай рахадайла инсан, пешекар гафар чIехи гьарфунилай кхьиниз лайихлу я.
М. Наврузалиева 1947-йисан 25-февралдиз Кьурагьрин хуьре къуллугъчидин хзанда дидедиз хьана. Вичин зегьметдин рехъ ада 1968-йисан 1-апрелдиз ВЛКСМ-дин Сулейман-Стальский райкомда секретарь-машинисткавиле кIвалах авунилай башламишна. Гуьгъуьнлай М. Наврузалиевади секретарвилин везифаяр «Самур-Гуьргеричай» УОС-да давамарна.
1971-йисан 15-февралдилай инихъ Маисат Насировнади, чна винидихъ лагьайвал, райондин судда секретарвиле кIвалахзава.
- Лагьана кIанда хьи, суддин секретардин къайгъуяр, кIвалах гзаф я, - давамарзава ихтилат Мегьамедзайид Мегьамедмирзоевича. – Абур Маисат Насировнади законрин истемишунрихъ галаз кьадайвал кьилиз акъудзава. Идалайни гъейри, ада жегьил пешекарриз кIвалахда куьмекар гузва, вичелай абуруз гьар са карда чешне къалурзава.
Тежрибалу пешекар тир М. Наврузалиевадихъ Россиядин Федерациядин гражданский къуллугъдин 2-классдин государственный референтвилин чин ава.
Маисат Насировнади 2009-йисуз Россиядин юстициядин министерстводин правовой академиядин Кеферпатан Кавказдин филиалда вичин чирвилерин дережани хкажна.
М. Наврузалиевадин яргъал йисарин намуслу зегьмет РФ-дин судебный Департаментдин Дагъустан Республикада авай управленидин, ДР-дин Верховный суддин, муниципальный райондин, райондин суддин патай гзаф кьадар грамотаяр, къиметлу пишкешар гуналди къейднава.
Маисат Насировнадин пешекарвилин виниз тир дережадикай ихьтин кардини шагьидвал ийизва. Яшдиз килигна лайихлу пенсиядиз экъечIдай ихтияр авайтIани, райондин федеральный суддин председателди адахъ галаз кIвалахдин рекьяй икьрар кутIунна ва пуд йисуз М. Наврузалиевади вичин везифаяр давамна.
- Маисат Насировна хьтин пешекардихъ галаз кIвалах авун за бахтлувал яз гьисабзава, - лугьузва судьядин куьмекчи Салман Алимирзоева. – Ам кIвалахдив эгечIзавай тегьер, вахтунда кIвалахал атун-хъфин чаз чешне я.
Чаз малум хьайивал, хъсан пешекар хьиз, Маисат Насировна кIвалин къул хуьзвай кайвани, мегьрибан дидени я. Уьмуьрдин юлдаш Седрединахъ галаз Маисата 4 велед хана, хвена, абур уьмуьрдин шегьредал акъудна. Катран мукай анжах кард къарагъда лагьайвал, абурун веледри кьилин образованияр къачуна. ИкI, чIехи руш Салията Москвадин областдин Люберецкий райондин Кореново поселокда, Эмирхана Москвада, Жамиляди Москвадин Лосиноостровский районда чпин пешейрай кIвалахзава, Къудрат РОВД-да уголовный розыскдин оперуполномоченный я.
Чаз суддай хабар гайивал, яшариз килигна Маисат Насировна мукьвара кIвалахдилай экъечIзава. Лайихлу пенсиядиз ам шад гьалара рекье твазва.
Чазни М. Н. Наврузалиевадихъ элкъвена, лугьуз кIанзава:
- Къуй ваз яргъи ва сагълам уьмуьр кьисмет, веледрикайни хтулрикай ви рикI динж хьурай!