Эхиримжи вахтара Уллугъетягърин врачебный амбулаторияда хъсанвилихъди еке дегишвилер кьиле фена. Виликдай амбулатория колхоздин конторадин са кIвале авай. Ида духтурриз инсанар кьабулунин, абурун сагъламвал ахтармишунин, лазимвал авайбуруз медицинадин рекьяй куьмек гунин кIвалах четинарзавай. И кар фикирда кьуна, хуьруьн администрациядин кьил Агъарзаева Зуьгьрехалуман теклифдалди патав гвай клубдин дараматдин кьве кIвал амбулаториядив вахкана. Анагар духтурри чпин пулунин такьатралди ремонтна. И кардик са шумуд пенсионердини чпин пай кутуна. Нетижада гила амбулаториядихъ хъсандиз тадаракламишнавай 5 кIвал хьанва. Ида гьар са духтурдиз азарлуяр кьилдин кабинетра кьабулдай мумкинвал гузва.
Лагьана кIанда хьи, амбулаторияда чпихъ махсус образование авай 5 касди кIвалахзава. Анин кьиле кIвалахдин гзаф йисарин тежриба авай духтур З.Шихгьасанова акъвазнава. Адан, гьакIни участкадин медсестра Н.Гьабибовадин, ЭКГ-дин медсестра И.Алиевадин ва масабурун кIвалахдилай агьалийри разивал ийизва.
Мадни са кар къейд ийиз кIанзава. Санлай къачурла, амбулаториядин духтурри неинки Уллугъетягърин, гьакI патарив гвай мад 5 хуьруьн агьалийризни медицинадин рекьяй къуллугъзава.