Эхиримжи вахтара чи райондани агьалийрин патай, куьруь са вахтунда вахкуда лугьуз, пулунин буржар кьаз, ахпа йисаралди вахкун тийизвай, эхир гьатта судрални аватзавай дуьшуьшарни гзаф жезва.
ИкI алатай йисан 15-декабрдиз райондин суд агъастIалвияр тир Зорик ва Закир Абдулвагьабовривай бурж яз вугай пул вахчунин мураддалди и хуьруьнви Ф.Я.Ягьияева ганвай арзадин гьакъиндай ачух заседанидал гражданский делодиз килигна.
Анал тайинарайвал, Ягьияев Фейзудин Ягьияевича вичин арзада Абдулвагьабов Зорик ва Закир АбутIалибо-вичривай 909422 манат пул, гьа гьисабдай яз Абдулвагьабов Зорикавай 556725 манат ва гьакIни адвокатдин къуллугъдай гайи 3500 манат пулни вичин менфятдиз вахкун истемишзавай. Ада тестикьарайвал, 2007- йисан 9- июлдиз Мегьарамдхуьре Абдулвагьабов Зорик АбутIалибовича 2007-йисан 20-ноябрдалди вахкуда лагьана Ягьияев Фейзудин Ягьияевичавай 210 агъзур манат пул бурж къачунвайдан гьакъиндай кьве терефдин къуларни алаз икьрар кутIунна. Амма гьикьван истемишнатIани буржлуда алай бурж вахканач. Бурж вугунин икьрардин ва распискадин бинедаллаз вахкана кIанзавай кьадарни къейдна.
Ада гьакI вичивай 2006-йисан июндин вацра Абдулвагьабов Закир АбутIалибовича бурж яз къачур (вацра 5 процент алавани алаз вахкуда лагьана) 90 агъзур манат пулни вахчун тIалабна ва вичин истемишунрин гьахълувал тестикьарун патал буржлуда 2006- йисан 4- июндиз вичиз гайи расписка суддин вилик гъана.
Суддал ада вичин истемишунар тестикьар хъувуна ва Закирав 90 агъзур манат пул вугудайла, расписка кхьидайла анал адан стха Зорик АбутIалибович алайдини лагьана.
Абуру закондин истемишунрин бинедаллаз бурж вахкунин вахт алатайла а кьадардилай йиса 100 процент алава яз пул кьунин нетижаяр акъудайла, чна алай буржар эцигунардай ва маса къиметлу шейэралди вахкайди я, абур дуьз делилар туш лугьуз ва маса багьнаяр акъудиз, буржар вахкуникай кьил къакъудиз алахъна. Амма суддал абур бине авачирбур тирди субутарна.
Делода авай материалар, шагьидрин къалурунар фикирдиз къачуналди ва РФ-дин ГК-дин 807-812-статьяйрал, гьакIни РФ- дин ГПК-дин 194-198-статьяйрал бинеламиш хьуналди, судди Ф.Я.Ягьияеван арзадин истемишунар дуьзбур яз гьисабна ва Абдулвагьабов Зорик АбутIалибовичавай Ягьияев Фейзудин Ягьияевичан менфятдиз 556725 манат, гьа гьисабдай яз асул бурж тир 210 агъзур манат, бурж вугунин икьрардин бинедаллаз, процентар яз 346725 манат вахчунин ва гьакIни государстводин менфятдиз госпошлина яз гайи 6884 манат пул кьунин, Абдулвагьабов Закир АбутIалибовича-вайни 334104 манат, гьа гьисабдай яз 90 агъзур манат асул бурж, 244104 манатни распискадин бинедаллаз процентар яз, пул вахчунин ва гьакIни государстводин менфятдиз госпошлина яз гайи 4941 манат пул кьунин къарар акъудна.
А къарар къуватда гьатнава.
Мад са ихьтин мисал.
Алай йисан 15-апрелдиз райондин суд ачух заседанидал Эмирханова Бигимагъа Къурбанисмаиловнадивай ада бурж яз къачур 390 агъзур манат ва гьакIни вичи госпошлина яз гайи 2894 манат, адвокатдин зегьметдин гьакъи яз гайи 1500 манат пул вичин менфятдиз вахчунин гьакъиндай Сирхаев Сирхав Баламирзоевичан арзадин бинедаллаз гьазурнавай гражданвилин делодиз килигна.
Суддал арза ганвайда вичи истемишзавай пулунин кьадар дегишарна ва ада Б.Эмирхановади 2008- йисан 17-сентябрдиз гайи распискадин бинедаллаз вичивай бурж яз 120 агъзур манат къачурди тестикьарна ва адавай а бурж ада 2008- йисан 17-сентябрдиз гайи распискада къейд авунвайвал, тайинарнавай вахтунда вахкуз тахьай гуьгъуьнин гьар вацра 15 процент алава пулни алаз, вахкун истемишна. Ада къейд авурвал, бурж ада распискадин бинедаллаз са вацралай, яни 2008-йисан 17-октябрдалди вахкуда лагьайди тир. Амма гьар жуьре багьнайралди, мад цIийи распискаяр кхьин хъийиз, цIийи хиве кьун хъувунар ийиз хьана. ИкI, 2009-йисан 11-ноябрдиз гайи распискада Б.Эмирхановади бурж (процентарни галаз) 390 агъзур манатдин кьадарда аваз 2009-йисан 17-декабрдиз вахкун хиве кьуна, амма а бурж и вахтундани вахканач.
2010-йисан 5-февралдиз кьиле фейи суддин заседанидал буржлу тирда, распискадин бинедаллаз, С.Сирхаевав 120 агъзур манат пул асул бурж вахкана. Гьа са вахтунда арзачиди бурж къачурдавай 2008-йисан 1-октябрдилай 2010-йисан январдин варзни кваз асул бурж тир 120 агъзур манатдилай гьар вацра 15 процент кьун хъувун истемишна.
Судди, вири делилар, шагьидрин къалурунар веревирд авурла, адан истемишун тамамвилелди кьилиз акъуддайди субутарна.
РФ-дин ГК-дин 180 статьядихъ галаз кьадайвал, бурж къачузвайда бурж кьазвайдав, бурж кьунин икьрарда тайинарнавайвал, вири кьадар пул вахтунда вахкун лазим я. И кIвалах хьанач.
Арза ганвайдан ва закондин истемишунрихъ галаз кьадайвал процентарни галаз гьисаб кьунар авурла умуми буржунин кьадарди са миллионни 122 агъзурни 906 манат тешкилна. Адакай вахканвай 102 агъзур манат хкудайла бурж тир кьадар са миллионни 2906 манат яз амукьна. Арза ганвайдан тIалабуналди бурж къачурдавай а кумай буржунин кьадардилай госпошлина яз къвезвай 9115 манатдикай 2894 манат арзачидив вахкунин ва 6221 манат госпошлина яз государстводин менфятдиз вахкудайвал хьана.
РФ-дин ГК-дин 807, 395 лагьай ва РФ-дин ГПК-дин 194-198-статьяйрал бинеламиш хьуналди, судди Сирхаев Сирхав Баламирзоевичан арза кьилиз акъудунин, ЦIийи Макьарал яшамиш жезвай, вич 1967-йисан 4-январдиз ханвай Эмирханова Бигимагъа Къурбанисмаиловадивай Сирхаев Сирхав Баламирзоевичан менфятдиз са миллионни кьве агъзурни 906 манат пул, гьакIни суддин рекьериз акъатай харжияр яз 2894 манат ва адвокатдин зегьметдиз гузвай гьакъи яз 1500 манат пул кьунин ва гьакIни госпошлина яз гьукуматдин менфятдиз 6221 манат пул кьунин къарар акъудна.