Алай йисан 1-январдиз райондин «Куьредин хабарар» газетдиз акъатай «Кьезилвилерин гьакъиндай» макъаладин жигьетдай, са жерге районэгьлийрин тIалабуналди ва дуьз гъавурда гьатун патал, ихьтин алава хъийиз кIанзава.
Кьилди къачуртIа, къейд ийиз кIанзава хьи, 2004-йисан 30-декабрдиз 64-нумрадик кваз акъуднавай ДР-дин Закондив кьадайвал, хуьруьн чкайра ва шегьердин къайдадин поселокра кIвалахзавай ва яшамиш жезвай здравоохраненидин госучрежденийрин медицинадин ва формацевтикадин работникриз ва гьакIни абурухъ галаз санал яшамиш жезвай хзанрин членриз экв ва чимивал авай яшамиш жедай майданрикай (кIвалерикай) менфят къачудай ихтияр ава. И ихтияр федеральный законодательстводихъ галаз кьадайвал, чкадин чпи-чеб идара ийизвай органри тайинарда.
Гьа са вахтунда а карни фикирдиз къачуна кIанда хьи, хуьруьн чкайра ва шегьердин къайдадин поселокра кIвалахзавай ва яшамиш жезвай агьалийрин кьилдин категорийриз яшамиш жезвай чкадин ва коммунальный къуллугърин гьакъи гунин жигьетдай социальный рекьяй куьмек гунин серенжемар кардик кутунихъ галаз алакъалу тир харжар (расходар) Дагъустан Республикада тайинарнавай яшайишдин майданрин социальный нормайрин ва коммунальный къуллугърикай менфят къачунин норматив сергьятра аваз арадал хкида.
Социальный жигьетдай куьмек гунин серенжемар тайинарунихъ галаз алакъалу тир харжар арадал хкунин жигьетдай винидихъ къалурнавай нормаяр ва нормативар образовательный учрежденийрин педагогвилин работникриз талукь туш.