Эхиримжи йисара чи республикадин гзаф чкайра хьиз, чи райондани исламдин дин кIвачел ахкьалдар хъувунин месэладиз къвердавай артух фикир гузва: райондин центрадал жуьмя мискIин ва медреса кардик ква, хуьрера куьгьне хьанвай мискIинар туькIуьр хъийизва, абур авачир чкайра цIийибур эцигзава. Райондин сергьятда кардик квай, Дагъустандин Духовный управленида регистрация авунвай 17 мискIин ава.
4-мартдиз ЦIийи поселокда цIийи мискIин ачухуниз талукьарнавай райондин динэгьлийрин еке межлис кьиле фена. Аниз райондин вири хуьрерин мискIинрин имамар, хейлин динэгьлияр атанвай.
Межлисдин президиумдиз муниципальный райондин администрациядин кьилин заместитель С.Велиев, «сельсовет Касумкентский» поселенидин кьил Б.Бремов, культурадинни информациядин управленидин начальник М.Бабаханов, агъсакъалрин Советрин председатель Х.Асланов, райондин имам Р.Рустамов, ЦIийи мискIиндин имам Ш.Адулмуталибов ва теклифнавай маса мугьманар хкаж хьана.
Динэгьлийрин межлис мискIиндин имам Абдулмуталибов Шамсудин гьажиди ачухна ва кьиле тухвана. Вичин куьруь рахунра мискIинрин тарихдикай, акьалтзавай несил тербияламишунин карда мискIинрин ролдикай, жегьилар мискIинриз атайла, абур куьчейрин нагьакьан крарикай къерех жедайди, пIапIрус-эрекьдикай хкатдайди, диде- бубадин, мукьва- кьилийрин, ярар- дустарин гьуьрмет хуьнин алакъайрин кардизни таъсир ийидайди лагьана.
Ада къейд авурвал, мискIин эцигиз 1998- йисуз башламишнай. Пулдин такьатар тахьун себеб яз эцигунар са тIимил яргъал фена. МискIин эцигна кардик кутун патал муниципальный райондин Кьил И. М. Яралиева 1,5 миллион манат пулдин ва маса куьмекар гана. Чи Москвада, Махачкъалада ва маса шегьерра авай лезги стхайрини чIехи куьмекар гана. Абуруз вири динэгьлийрин патай чухсагъул лагьана.
Гаф райондин имам Рустамов Рамазан гьажидиз гана. Ада кIватI хьанвайбуруз цIийи мискIин ачухун мубаракна.
- Вуч ийидатIа тийижиз, рехъ квахьнавай жегьилар нагьакьан крарал машгъул жезва. Эгер вахтунда динэгьлийри, диде- бубайри, тарс гузвай муаллимри, гьукумдарри, къуватар сад авуна, акьалтзавай несил дуьз рекьел тагъайтIа, нетижаяр хъсанбур тежедайни ашкара кар я. И жигьетдай жегьилар дуьз рекьел гъунин карда диндин маналувал зурба я,- лагьана ада .
Межлис тухузвайди тир Шамсудин гьажиди гаф муниципальный райондин администрациядин кьилин заместитель С.Велиеваз гана. Ада райондин динэгьлийри исламдин пак ивирар, чи бубайрин хъсан адетар хуьнин жигьетдай тухузвай баркаллу кIвалах къейд авунихъ галаз сад хьиз райондин депутатрин Собранидин, администрациядин ва кьилди И.Яралиеван тIварцIихъай къенин межлис мубаракна, ихьтин мярекатри чи халкьарин алакъа мягькемаруниз, адалат, ислягьвал хуьниз еке куьмек гудайди къейдна. Ахпа гаф мискIин эцигиз башламишай сифте йикъалай анал зегьмет чIугур Гъаниев Даир гьажидиз гана.
- Чун вири и дуьньядин винел мугьманар хьиз къвезвайди садазни сир туш. Гьавиляй чун- гьар сад жувалай гуьгъуьниз са гел таз, гележегдин несилар патал баркаллу крар ийиз алахъзава. Къе заз мискIин арадал атун патал куьмекар гайи Абдулмуталибов Шамсудин гьажидиз, Бремов Амридиназ, Москвада яшамиш жезвай Расулов Морисаз, «сельсовет Касумкентский» поселенидин кьил Бремов Бремаз, стхаяр МутIагьир ва Халид Алискендаровриз ва гзаф масабуруз чухсагъул лугьуз кIанзава,- лагьана ада вичин рахунра. Анал динэгьли Адиката цIийи мискIиндиз бахшнавай вичин шиирни кIелна.
Мярекатдин иштиракчийрин мурад сад тир - ислам дин дин пак ивирар хуьн, Дагъустандин чилел адалат, къайда, ислягьвал, инсанрин хатасузвал хуьн таъминарун.
Рахунрилай гуьгъуьниз мискIин ачухунин лишан яз мискIиндин имам Ш.Абдулмуталибовани муниципальный райондин администрациядин кьилин заместитель С.Велиева къацу лент атIана.
Эхирдай динэгьлийри мискIинда мевлид кIелна, капI авуна.
Къуй чаз Аллагьди Вичин эвер гунрин гъавурда дуьз акьуниз ва абурун геле аваз финиз куьмекрай.
Къуй диндин рекье ийизвай гьерекатриз Аллагьди куьмек гурай.