«Алай аямдин школадин кьилин везифа гьар са ученикдин алакьунар ачухуникай, вини дережайрин технологийрин, конкуренция кьиле физвай дуьньяда яшамиш жез гьазур инсан тербияламишуникай ибарат я».
(РФ-дин Федеральный Собранидиз РФ-дин Президент Дмитрий Медведеван Чарчяй).
Акьалтзавай несилдиз чирвилер ва тербия гунин рекьяй Чуьхверхуьруьн юкьван школа (директор Рамазан Къафланович Аливердиев) чи районда хъсанбурукай сад я.
Школада 43 муаллимди зегьмет чIугвазва. Абурукай 4-дахъ кьилин, 31-дахъ 1-категорияр ава. Чпин хиве авай везифаяр намуслудаказ кьилиз акъудзавай, аялриз чирвилер ва тербия гунин рекье гьар йисуз хъсан нетижаяр жезвай муаллимрикай яз школадин директорди чаз завуч Таривердиев Вердиханан, лезги чIаланни литературадин муаллим Абдулкъадиров Мегьамедзагьиран, математикадин муаллим Тагьирбегова ФатIиматан, урус чIаланни литературадин муаллим Ибрагьимова Людмиладин ва масабурун тIварар кьуна.
Школада 234 аялди кIелзава. Абурукай 153 чIехи, амайбурни гъвечIи классра кIелзавайбур я. Чаз малум хьайивал, гзаф аялри вири предметрай «4» ва «5» къиметар аваз кIелзава, райондин ва республикадин школьникрин олимпиадайра кIвенкIвечи чкаяр кьазва. Ихьтинбурукай яз чавай Абасмирзоева Унезатан, Агьмедова Нинадин (кьведни 11-класс), Тарашев Разиман, Гьасанов Кериман (кьведни 10-класс), Гьажибекова Гуьлнарадин (9-класс) ва масабурун тIварар кьаз жеда.
Хъсан къиметар аваз кIелзавай, чпи школадин общественный уьмуьрда активвилелди иштиракзавай 40 аялдин шикилар аваз школада «Абур чи дамах я» кьил ганвай стенд акъуднава.
Школьникрин чирвилерин дережа хкажунин ва зигьин деринарунин мураддалди школада 6 класс-кабинет тадаракламишнава, жуьреба-жуьре 7 кружок кардик ква. 30-дав агакьна аялри школадин художественный самодеятельностдин кIвалахда иштиракзава, гзаф аялар спортдал машгъул жезва. РФ-дин лайихлу тренер Малик Тагьирбекован гъилик армспортдай вердишвилер къачузвай гадайрихъни рушарихъ иллаки тарифдин нетижаяр жезва.
Мукьвара школада пищеблокдин цIийи дарамат эцигна, анаг тадаракламишна ва ишлемишиз вахкана. Ана 1-4-классра кIелзавай 31 аялдиз чими тIуьнар гузва.
Чаз акурвал, школада аквадай агитациядин такьатриз кьилин фикир ганва. Цларал алай «Чи баркаллу хуьруьнвияр», «Игитриз баркалла», «Абуру Ватандин азадвал патал женг чIугуна», академик Гь. И. Мегьамедоваз талукьарнавай «Чи хуьруьн дамах», «СтIал Сулейман – ХХ асирдин Гомер», «Етим Эмин – лезги поэзиядин нурлу гъед», «ЕГЭ-дин информационный стенд», «Чи выпускникар – Ватан хуьнин къаравулда» ва маса стендар метлеблубур, фикир желбдайбур хьанва.
Школада «Биология», «Лингвист», «Физика», «Булах», «Лечебница», «Экология»», «Факел», «Школа ва производство» тIварар алаз цлан газетар акъудзава.
Муаллимрихъ галаз санал аквадай агитациядин такьатар ва цлан газетар акъудунин кIвалахра школьникри активвилелди иштиракзава.
Школадин педколлективдихъ 2009-2010-кIелунин йисни акьалтзавай несилдиз чирвилер ва тербия гунин рекьерай хъсан нетижаяр аваз акьалтIарунин къаст ава. И кар патал абуру чалишмишвални ийизва.
Эхирдай ихьтин са кардикайни лугьуз кIанзава. Школада гзаф къанажагълу, жумартлу ва ватанперес муаллимри кIвалахзава. И кар абуру райондин «Куьредин хабарар» газет подписка авуник гьар йисуз еке пай кутуналди ачухдиз къалурзава. Райондин газет алай вахтунда 32 муаллимди къачузва. Идай чна абуруз аферин ва баркалла лугьузва.