Алатай гьафтеда райондин хзанриз ва аялриз социальный жигьетдай къуллугъ ийидай Центрада (ЦСПСД-да) дидейрин йикъаз талукьарнавай шадвилин мярекат кьиле фена. Ам дидейрикай, абуру инсаниятдин уьмуьрда къугъвазвай ролдикай, гьукуматди дидейрин гьакъиндай ийизвай къайгъударвиликай лугьуналди, Центрадин социальный рекьяй педагог Гегьвер Шагьмардановади ачухна ва кьиле тухвана.
Ахпа анал гаф гана рахай Центрадин директордин заместитель Имара Алиевади шадвилин мярекатдиз теклифнавай гзаф аялар авай дидеяр тебрикна, абуруз сувар мубаракна. Идахъ галаз санал, ада Центрадин кIвалахдикай, райондин руководстводи дидейрин гьакъиндай ийизвай къайгъударвиликай гегьеншдиз суьгьбетна.
Дидейрин зегьмет екеди, къимет авачирди, гьич са вахтундани са шейиналдини эвез ийиз тежерди къейд авуналди, шадвилин мярекатдал хуш келимаяр райондин УСЗН-дин отделдин начальник Шамсият Магьмудовадини лагьана.
Дидейрин патай ихьтин шад мярекат тешкилунай, хуш келимаяр лугьунай гзаф аялар авай диде Саният Гьайбатовади райондин руководстводиз, Центрадин коллективдиз рикIин сидкьидай чухсагъул малумарна.
И мярекатдин эхирдай Имара Алиевади дидейриз къиметлу пишкешар ва пул авай конвертар гана.
Имара Алиевнади чаз лагьайвал, и мярекат тешкилуниз спонсорвал РФ-дин ФНС-дин Дагъустан Республикада авай 2-нумрадин МРИ-дин руководитель Марат Гьасанова, «Кьасумхуьруьн почтамт» ФГУ-дин начальник Ниби Фетягьова, райондин УСЗН-дин начальник Жавидин Бремова ва ТЦСЗН-дин директор Абдулфетягь Бабаева авуна.
Шадвилин мярекат метлеблуди ва рикIел аламукьдайди хьана.