Сулейман-Стальский район Республики Дагестан
www.old.suleiman-stalskiy.ru

Ада вичин буржи кьилиз акъудна

ЧIехи Октябрдин инкъилаб гъалиб хьайи пуд йикъалай адан къазанмишунар хуьн патал тешкилай милициядин важиблувал къенин юкъузни чIехиди я. Демократиядикай менфят къачуналди, международный террористри ва бандитрин дестейри, диндин экстремистри чи республикада адан общественный къурулуш дегишариз, чпиз кIандай къайдаяр тваз алахънавай алай четин шартIара халкьдин законлу интересар ва конституциядин ихтиярар хуьн таъминарунин карда милиция уяхдаказ акъвазнава. Абурал бандитрин дестейри «гьакъикъи гъуьрч» ийизва лагьайтIа чун гъалатI жедач. Ихьтин четин шартIара чи халкьдин умудлу даях тир милициядин работникри, чанарни гьайиф татана, чпин хивевай буржи эхирдалди кьилиз акъудзава.

Ихьтинбурун жергедай яз 2008-йисан 19-июндиз чи райондин «совхоз Герейханово» хуьруьн кьиликь галай  контрольно-загородительный постунал вичин къуллугъдин везифаяр кьиле тухудайла телеф хьайи, вичин бине Герейханован хуьряй тир, Къазиагьмедов Роберт Абидиновичан тIварни кьаз жеда.
Р.А. Къазиагьмедов 1973-йисан 29-июндиз Герейханован хуьре дидедиз хьана. Хуьруьн юкьван школа, гуьгъуьнлай «Юждаг» университетдин экономический факультет, 2007-йисуз Россиядин МВД-дин Краснодардин университетдин юридический факультет акьалтIарна.
1990-1991-йисара Герейханован тIварунихъ галай совхозда рабочий яз кIвалахна. 1991-1993-йисара Советрин  Армиядин жергейра къуллугъна.
1994-2001-йисара Дербент шегьердин ветеринарный управленидин водитель яз кIвалахна.
2001-2002-йисара ДР-дин  чи  райондин ОВД-дин патрульно- постовой къуллугъдин милиционер-стажер яз, 2002-йисан 1-январдилай 2008-йисан 20-июндалди РОВД-дин милициядин  патрульно-постовой къуллугъдин отделенидин милиционер яз кIвалахна.
2008-йисан 19-июндиз милициядин старшина Р.Д. Къазиагьмедова «совхоз Герейханово» контрольно-загородительный постунал вичин къуллугъдин везифаяр кьиле тухузвай. Йифен сятдин 12 дан зураз Герейханован хуьр галай патахъай гуьзгуьяр къенепата авайбур таквадайвал пленка янавай шак фидай ВАЗ-2106 маркадин автомашин атана. Р.А. Къазиагьмедова автомашин акъвазарун истемишайла водителди, скорость явашарна, акъвазардай амалар авуна, садлагьана постунилай зарб кваз автомашин шегьре рехъ галайвал гьална. Вичихъ галаз постунал алай юлдаш милициядин старший сержент Р.Р. Рамазановни галаз Р.А.Къазиагьмедов и рекьяй физвай А.А.Келбялиева идара ийизвай ВАЗ-21102 маркадин автомашиндаваз адан гуьгъуьниз фена ва постунилай са 500 метрдин мензилда абурун виликай рехъ атIана. Гьеле машиндай эвичIдалди Р.А. Къазиагьмедоваз акуна хьи, а машиндай камуфляжный форма алай 4 кас эвичIна, чеб авай машиндиз автоматрай гуьлле гузва. Вичин табельный яракь гъиле кьуна машиндай хкадарайла ада галай юлдашдиз ва водителдизни машиндай хкадарна акси серенжемар кьабулунин буйругъ гана. Р.Къазиагьмедован гьерекатар акурла тахсиркарри автоматрай адал цIай къурна. Гьеле машиндай хкадардайла руфунал гуьлледин хер хьайи Робертаз чилел ярх хьайи чкадилай тахсиркарар ягъиз кIан хьана. Амма кьилихъ ва бедендихъ гзаф кьадар гуьллеяр галукьай ада гьа чкадал чан гана.
Террористар кьун патал   Р.А.Къазиагьмедован кьетIи гьерекатри ва адан викIегьвили райондин агьалийрин патай милициядин работникриз авай гьуьрмет мадни артухарна.
Райондин къайдаяр хуьдай органрин ветеранрин ва агъсакъалрин  Советри «Сулейман-Стальский район» муниципальный тешкилатдин руководстводивай  милициядин старшина Р.А. Къазиагьмедоваз «ВикIегьвилин орден» гунин (кьейидалай гуьгъуьниз) патахъай талукь тир органрин вилик ходатайство гваз экъечIун тIалабна.
«Сулейман-Стальский район» муниципальный райондин Кьил Имам Музамудинович Яралиеван чалишмишвилерин нетижада, Россиядин Федерациядин Президент Д.А.Медведева 2009-йисан  30-августдиз акъудай Указдалди Къазиагьмедов Роберт Абидиновичаз «ВикIегьвилин орден» (кьейидалай гуьгъуьниз) ганва.
Ам регьметлудан уьмуьрдин юлдаш 2 аялдин диде Людмиладив ноябрдин вацра милициядин Йикъаз талукьарна Махачкъалада кьиле фейи мярекатдал вахкана.
Милициядин старшина регьметлу  Къазиагьмедов Роберт Абидиновичан тIвар эбеди авун патал хуьруьн жемятди хуьруьн юкьвал алай стадион адан тIварунихъ янава, хуьруьн куьчейрикай садаз  адан тIвар гунни кьетIнава.
Эхь, бубайрин мисалда лугьудайвал, устIар кьена кар амукьда, игит кьена-тIвар. Чи халкьдин конституцияди ганвай ихтиярар ва азадвилер хуьн патал вичин чан къурбанд авур Роберт Абидинович хьтин кьегьал рухвайрин тIварар эбеди авуниз лайихлу я .
Абурун уьмуьрар игитвилер чи акьалтзавай несил ватанпересвилин руьгьдаллаз тербияламишунин карда ачух чешнеяр я.  
 

Адрес статьи: http://old.suleiman-stalskiy.ru/?com=articles&page=article&id=1359