Сулейман-Стальский район Республики Дагестан
www.old.suleiman-stalskiy.ru

Куьредин муьгъ – тарихдин шагьид

Алай йисуз вичин 80 йис тамам хьунин юбилей къейд ийизвай СтIал Сулейманан районда чеб тарихдин шагьидар тир имаратар, гьар са касди чпин гуьзелвилел гьейранвал ийизвай дереяр, булахар, пак чкаяр гзаф ава. Абурукай сад, гьелбетда, Кьасумхуьруьн 17 вилин муьгъ я.

Малум тирвал, вилик вахтарани Урусатдай, Азербайжандай Кьурагь, Хив, Агъул районриз ва масанриз физ-хуьквезвай инсанар Кьасумхуьруьн патавай Чирагъ вацIалай элячIуниз мажбур жезвай.
Абуруз, гьакIни жуьреба-жуьре дерди-балайриз къвез-хъфизвай дагъвийризни и кар четин акъваззавай. ВацIуз гзаф яд атайла и кар мадни четин жезвай. Гьа ихьтин крариз килигна, советрин власть тестикь хьайи сифте йисара Куьре округдин (адак Кьурагь, Хив, Мегьарамдхуьруьн ва Агъул районрин хуьрерни акатзавай) гьакимри Кьасумхуьруьн кIанихъай, Кьурагь ва Чирагъ вацIар сад-садак какахьна Гуьлгери вацI арадал къвезвай чкадилай са тIимил виняй, Чирагъ вацIал муьгъ эцигун кьетIна. 17 вилин муьгъ эцигунин жавабдарвал Дербентдин рекьерин участокдин инженер Николай Андреевич Каспиран хиве тунай. Гьелбетда, девир дарди тир, а вахтунда эцигунрин рекьяй лазим техника, цемент, ягъай къванер ва герек маса затIар бес кьадар авачир. ЯтIани, арабайралди къванер ва накьв гъиз, патай атанвай эрмени устIаррихъ галаз вишералди дагъвийри зегьмет чIугуна, Чирагъ вацIал муьгъ эцигна. И кардик Куьре округдин секретарвиле, гуьгъуьнлай председателвиле кIвалах авур Гьасанов Алискендер Абумислимовича еке пай кутурди къейд ийиз кIанзава. И чIавуз гзаф инсанри хсуси мал-къара, лапагар садакьа яз ганай.
Муьгъ эцигна акьалтIарайла шаир СтIал Сулеймана ихьтин шиирдин цIарарни кхьенай:
ЦIерид тагъ, цIемуьжуьд сутун,
ИкI мягькем сад-садав гутун!
Тамам Баку, Тифлис, Батум
Жез туш барабар и муькъуьн.

Тамам Куьре эгьли вири,
Жем хьана чун куьлуь, ири.
Чи чIехи тир юлдашари,
Ачухна чаз вар и муькъуьн.
17 вилин муьгъ эцигна акьалтIарайла Куьреда еке шадвилер кьиле фенай.
Дагъустанда Советрин власть тестикь хьайи сифте йисара эцигай муькъуь агьалийриз къени къуллугъзава. Райондин чIехибуру, рекьерин участокдин пешекарри тарихдин шагьид тир и муьгъ саламатдиз хуьн патал къайгъударвални ийизва. Ам са шумудра ремонт хъувуна, муькъуьн са патай инсанар фин патал тротуар туькIуьрнава.
Мадни са кар къейд ийиз кIанза-ва. Транспортдин патахъай бубайрилай амай муькъуьз кьезилвал хьун патал Кьасумхуьруьн кьилихъай алай аямдин истемишунриз жаваб гузвай цIийи муьгъни эцигнава.
Куьредин 17 вилин муьгъ къе тарихдин имаратдиз элкъвенва. Саки 80 йисан девирда халкьдиз къуллугъ авур, и кар давамни ийизвай, тарихдин гзаф вакъиайрин шагьид хьайи и муькъуьв къадирлувилелди эгечIун гьар са касдин намусдин кар хьун лазим я.
 

Адрес статьи: http://old.suleiman-stalskiy.ru/?com=articles&page=article&id=1256