Гьар са вахтунихъ вичиз хас лишанар, кьетIенвилер ава. Ингье, зул тамамвилелди вичин ихтиярда гьатнава. Ида хуьрерин агьалийрин, хуьруьн майишатдин карханайрин, лежбервилинни фермервилин майишатрин зегьметчийрин къайгъуяр артухарзава. Кьилди къачуртIа, алай вахтунда карханайри цIинин йисуз авур кIвалахрин нетижаяр кьазва, идахъ галаз санал, къведай йисан бегьердин бинени кутазва. Магьсулдарар патал алайди иллаки къизгъин вахт я: абурун вилик къведай йисан бегьердин бине кутун патал никIера зулун магьсулрин тумар цунин везифа акъвазнава.
И кIвалахар гьикI кьиле физватIа чирунин мураддалди чун райондин хуьруьн майишатдин управленидин (УСХ-дин) начальникдин заместитель Гь. Абдулкъафаровахъ галаз гуьруьшмиш хьана ва са шумуд карханадиз фена.
- Алай йисуз, санлай къачурла, районда 2030 гектарда зулун магьсулрин тумар цун планламишнава, - лугьузва Гь. Абдулкъафарова. – И кар патал вири къуватарни желбнава.
Чаз малум хьайивал, икьван чIавалди райондин хуьруьн майишатдин карханайри, КФХ-ри, ЛПХ-ри, арендаторри ва агьалийри 1700 гектардив агакьна никIера ва чIурухъан чкайра цанар цанва.
Хуьруьн майишатдин карханайрикай «Ашагастальский» ЗАО-да 163 гектарда цанар цанва, и йикъара анра тумар чилик кутазва.
«ДаркIуш» ОАО-да 60 гектарда тумар чилик кутунва, и кар давамни ийизва.
«ЦIийи рехъ» СПК районда гьар йисуз гзаф майданра техилар цазвай хуьруьн майишатдин кооперативрикай сад я. ЦIи ина 70 гектарда тумар чилик кутада. Икьван чIавалди 50 гектарда и кIвалах кьиле тухванва.
«Юхаристальский» МУП-да 70 гектарда цанар цанва, анра тумар чилик кутунин кIвалахар давам жезва.
«Ашага-Араг» районда цIийиз тешкилнавай СПК я. Ада хейлин йисара са менфятни къачун тийиз гадарнавай чилерикай менфят къачун кьетIнава. Кьилди къачуртIа, къведай йисан бегьер патал СПК-ди 100 гектарда тумар цада. Бес кьадар чил цан цана гьазурнава. Тумни чкадал ала.
Санлай къачурла, райондин хуьруьн майишатдин карханайра 400 гектардилай виниз майданра зулун магьсулрин тумар чилик кутунва.
Тумар цунин кIвалахар Курхуьруьн участокда авай арендаторри ва кьилдин ксарин майишатри хъсан тешкиллувал аваз кьиле тухузва. Куьруь са вахтунда ана 300 гектардилай виниз майданра тумар цанва.
Мадни, икьван чIавалди райондин КФХ-ри 350, агьалийри 250 гектардин никIера зулун магьсулрин тумар чилик кутунва.
Къейд авун лазим я хьи, санлай къачурла, районда бес кьадар чил цана гьазур тавунвай, тумар хкана чкадал алачир карханаяр, КФХ-ярни ама. Вахт амазма, алахьай гьаваяр авай йикъарини цанар цадай, тумар чилик кутадай мумкинвал гузва. Гьавиляй райондин хуьруьн майишатдин карханайри, КФХ-ри, арендаторрини агьалийри зулун магьсулрин тумар вахтунда ва еридивди цана акьалтIарун патал вири жуьредин серенжемар кьабулун лазим я. Лугьудайвал, вири вахтуниз килигда, вахт са куьнизни килигдач.