Сийидрин хуьряй тир Гьамзатова Суьлгьуьжат заз фадлай таниш я. Мус гьалтайтIани, адан чина ачухвал аваз аквада.
- Ваз вуч аватIа чидани, стха, - лагьана зи суалдиз жаваб яз и йикъара гьалтайла С. Гьамзатовади. – Зак уьмуьрда шадвал кутазвай кьве кар ава: сад лагьайди, захъ къени, туькIвей хзан, ферли веледар ава, кьвед лагьайди, зун зи рикI алай пешедин иеси я.
Хзан ва кIвалах – кьве шадвал. Малум хьайивал, С. Гьамзатова Игит диде я. Ада 11 аял хана, хвена, халкьдиз, Ватандиз вафалу инсанар яз чIехи авуна. Чпин хзанар, кIвал-югъ хьанвай адан веледри къе жуьреба-жуьре пешейрин иесияр яз гьар сана кIвалахзава. Хтулри ва птулри Суьлгьуьжат дидедин гуьгьуьлар мадни шадарзава.
Пешедин рекьяй С. Гьамзатова библиотекарь я.
- И пешедал зун гьеле школада кIелзавай йисарилай ашукь тир, - лугьузва С. Гьамзатовади. – Ингье, 1967-йисалай инихъ за хуьруьн библиотекадин зеведишвиле кIвалахзава.
Вичин уьмуьрдин макьсад хзандай ва рикI алай пешедай аквазвай Игит диде, бажарагълу культработник, мегьрибан инсан тир С. Гьамзатовадиз хуьре-кIвале лайихлу гьуьрметни ава.