Район чIехи, адан агьалийрин кьадар артух хьуни «Кьасумхуьруьн почтамт» карханадин къайгъуярни артухарна. Са шумуд йисан вилик Сулейман-Стальский, Кьурагь, Агъул ва Хив районрин почтадин отделенияр сад хъувурла, къайгъуяр, везифаяр мадни къалин хьана. Почтамт лагьайтIа, 1972-йисуз эцигнавай дараматда авай. Гьавиляй ана работникриз кIвалахиз, йикъандавай-къуз артух жезвай агьалийрин игьтияжар таъминариз четин жезвай. Са гафуналди, дараматда дарвал авай.
«Кьасумхуьруьн почтамт» карханадин директор Наби Фатахова чаз лагьайвал, дараматда истемишзавай къайдада кIвалахдай шартIар авачирдахъ, дарвал авайдахъ шаз Кьасумхуьрел атайла «Почта России» ФУПС-дин Дагъустандин отделенидин руководитель Ухума Каргишиевни инанмиш хьана. Адахъ галаз меслят хьуналди, Кьасумхуьруьн почтамтдин дарамат гегьеншар хъувунин фикирдал атана. И кар патал «Почта России» ФУПС-ди 850 агъзур манат пул ахъайна, еке куьмек адан Дагъустандин отделениди, райондин руководстводи, кьилдин организацийри ва ксари гана.
2008-йисан октябрдин вацра почтамтдин дарамат гегьеншар хъийиз башламишна, эцигунрин кIвалахар гъиле кьуна.
Алатай гьафтеда цIийиз акал хъувунвай дарамат ачухуниз талукьарнавай шадвилин мярекат кьиле фена. Чна винидихъ тIварар кьур районра кIвалахзавай почтамтдин работникрилай гъейри, ана райондин администрациядин жавабдар работникри, адан къуллугърин ва маса организацийрин руководителри, теклифнавай маса юлдашри иштиракна.
Почтамтдин кIвалахрикай лугьуналди, шадвилин мярекат «Кьасумхуьруьн почтамт» карханадин директор Н. Фатахова ачухна. Ада къейд авурвал, карханади кьуд райондин агьалийриз къуллугъзава, 196 касди агьалийрин игьтияжар таъминарун патал гьакъисагъвилелди зегьмет чIугвазва.
Вичин рахунрин эхирдай Н. Фатахова акал хъувур цIийи дарамат эцигун патал пулунин такьатар чара авур, куьмекар гайи организацийриз, кьилдин ксариз чухсагъул лагьана.
- Къенин шадвилин мярекатдал заз Наби Фатахова почтамтдин начальниквиле 1967-йисалай инихъ кIвалахзавайдини рикIел хкиз кIанзава, - лагьана анал рахай райондин администрациядин кьилин заместитель Гьажиагьмед Мегьамедович Гьажиагьмедова. – Адан дурумлу зегьмет себеб яз, Кьасумхуьруьн почтамт республикада хъсанбурун жергеда ава. Къенин мярекат, акал хъувунвай цIийи дарамат мубарак авуналди, чаз почтамтдин коллективдихъ кIвалахда мадни еке агалкьунар хьана кIанзава.
Шадвилин мярекатдал рахунар, тебрикдин келимаяр мадни хьана.
Рахунрилай гуьгъуьниз Гь. Гьажиагьмедова ва Н. Фатахова цIийи дарамат ачухун патал лент атIана, мярекатдин иштиракчияр адан къенез гьахьна.
Чаз акурвал, почтамтдин дарамат къецел патай гуьрчег хьайиди хьиз, адан къене патани работникриз кIвалахдай къулайвал хьана.