Малум тирвал, вилик йисара чи уьлкведа хуьрерин спортсменрин арадани жуьреба-жуьре рекьерай акъажунар кьиле фидай ва абурун нетижайрикай вири хабардар ийидай. Ихьтин хъсан кьил кутунар яваш-яваш чи йикъарани майдандиз акъатзава. ИкI, августдин сифте кьилера, Челябинск шегьерда яшар хьанвай хуьруьн спортсменрин арада физкультурадин ва спортдин рекьяй РФ-дин министерстводин регьбервилик кваз самбодай Вирироссиядин хуьрерин къугъунрин гьисабдай Россиядин чемпионат кьиле фена.
И акъажунра Дагъустандин хкягънавай командадин составда аваз чи райондайни 4 спортсменди иштиракна.
И къизгъин акъажунра, чи машгьур тренер ва спортсмен Тельман Къурбанова лагьайвал, 2 кас – Султанов Рамиз (82 кг.) ва Дадашев Вагиз (74 кг.) – буьруьнждин медалрин сагьибар хьана. Бедендиз хасаратвал хьайи Алискеров Икрам 5-6-чкадиз лайихлу хьана.