И йикъара райадминистрациядин заседанийрин залда райондин культурадин работникрин совещание хьана. Аниз хуьрерин культурадин кIвалерин, библиотекайрин работникриз ва культурадин кIвалахдихъ галаз алакъа авай са жерге юлдашриз теклифнавай.
Совещание райадминистрациядин кьилин заместитель Гь. М. Гьажиагьмедова ачухна. Ада сифте гаф культурадин ва информациядин управленидин начальник Т. М. Султанагьмедоваз гана.
Ада райондин культурадинни информациядин управлениди йисан къене тухвай кIвалахдикай гьахъ-гьисабдин доклад авуна. Ада вичин докладда гьахъ-гьисабдин вахтунда районда ва адалай къеце культурадин еке мярекатар кьиле тухвай гьалдикай, анра культработникрин иштираквиликай, муниципальный райондин Кьил И. М. Яралиева культурадин хилез гузвай еке фикирдикай, ам вилик тухун патал кьабулзавай серенжемрикай, чара ийизвай такьатрикай, райондин 80 йисан юбилей лайихлудаказ къейд авун патал кьабулзавай серенжемрикай и жигьетдай культурадин идарайрин работникрин вилик акъвазнавай везифайрикай гегьеншдаказ лагьана, и жигьетдай бязи мярекатар кьиле тухудай вахтар тайинарна. Кьилди къачуртIа, райондин юбилейдиз талукьарна хуьрерин художественный коллективрин смотр-конкурс 25 –сентябрдиз РДК-да кьиле тухунин меслятдал атана.
И месэладай анал чпин фикирар, теклифар, чпи тухузвай ва фикирдиз къачунвай серенжемрикай куьруь информацияр гваз Эминхуьруьн СДК-дин директор Ш. Рамазанов, Герейханован хуьруьн 2-отделенидин СДК-дин директор Ф. Рамазанова, «Куьредин ярар» общественный культурадин центрдин председатель А. Агьмедпашаев ва маса юлдашар рахана.
Анал культурадин работникриз мажибар гунин цIийи къайдайрикай куьруь информация гваз райондин культурадинни информациядин управленидин кьилин бухгалтер И. Аллакъулиевани рахана.
Совещанидин кIвалахдиз райадминистрациядин кьилин заместитель Гь. М. Гьажиагьмедова итог яна.
Ада райондин 80 йисан юбилей лайихлудаказ къейд авун патал культработникрин везифаяр тайинарна, са жерге тапшуругъар гана.
Гьа иналди совещаниди вичин кIвалах акьалтIарна.